Vawiin chawhma dar 10:00 khan State Assembly inthlan lo awm tur atana inbuatsaihna kal zelah Serchhip District tana Observer, Pu P. Lalchhuanga IAS chuan District Bawrhsap pisaah Election Officials, Political Party aiawhte leh tlawmngai pawlte meeting a neihpui a, Special Summary Revision neih mekah inthlan kaihhnawih officials-ten harsatna an tawh leh tawh lohte leh an harsatna sutkian dan tur te an sawi ho a ni.

He meeting-ah hian Pu Chhuanga chuan inthlang ram kan nih avangin inthlanna leh a kaihhnawih thilah sawrkar neitu mipui tamtak te aiawh tura tlawmngai pawlte an tel ve thin chu thil inhmeh tak a ni tiin electoral roll dik leh rintlak kan neih theihna tur atan pawh Political Party te leh tlawmngai pawlte nena thawh hona tha a pawimawh thu a sawi bawk.

Pu Chhuanga chuan hmun tak takah foreigner leh an thlah ten India khua leh tuia inchhal nan Birth Certificate hman an tum thin tih sawiin Economics & Statistics department-in Birth Certificate an pekchhuah hi khua leh tui nihna lantirtu a ni lova, Mizorama piang leh an pian ni leh thla chinchhiahna mai chauh a ni tiin, khua leh tui nihna chhinchhiahna atan hman theih a ni lo a ti a, ERO leh AERO-te chu hetiang thilah hian fimkhur turin a chah bawk a ni.

Vawiin vêk chawhma dar 11:00 khan Serchhip DC Conference Hall-ah Election Nodal Officer Pu Lalsangliana, Addl. DC Serchhip leh Observer Pu H. Laizika MCS, Controller P&S te kaihhruainain EVM endik thawhkhatna neih a ni bawk a. EVM kan hman mek siamtu, Electronic Corporation of India Ltd. (ECIL) atanga Enginer pahnih lokal ten Political party hrang hrang aiawhte awm laiin, venhimna khauh tak hnuaiah EVM-te hi an endik a, rintlak a nih leh nih loh fiah nan khawl thlan bik awm lo; duh duh pawt chawpin vote thlak chhin a ni nghal bawk ang. He khawl endik thawh khatna hi naktuk hian zawh fel hman beisei a ni.