2156/2022-2023
Dated Serchhip, the 3rd October, 2022: Vawiin khan Serchhip DC Meeting Hall ah Faina Hapta, 2022 hawnna inkhawm buatsaih a ni a. Khuallian Pu Lalmuansanga Ralte, Addl. DC, bawrhsap mawhphurhna chelh mektu chuan a hawng.

Pu Lalmuansanga Ralte chuan, faina lama hmalaknaah Serchhip leh Serchhip district chhunga khaw hrang hrangten lawmman an lo dawng tawh thin a. Khang lawmman duhawm tak tak kan dawn thinte kha mipuite thawhrah, khawtlang hruaitute, tlawmngaipawl leh chhungkaw tinte thahnemngaihna zara lo awm a ni. Chutihrualin mihringten bawlhhlawh kan nei ve zela, chung kan bawlhhlawhte chu mumal taka tihralna kan neih loh chuan mihring hriselna leh kan leilungten an tawrh theih avangin tha thlah lova hma kan lak zel a tul a. Chuvang chuan faina hapta chhung chauh nilovin kan nitin nunah faina hi mitinten kan nunpui ngheh a tul hle. A hapta kan hman chhung hi chu uar zawka inzirtirna kan kalpui hunah ngai ila, kan nunphung zawk hian faina hi nghet takin i kalpui ang u, tiin kal khawmte a sawm a. Hapta hman chhungin nitin kawng hrang hranga inzirtirna an kalpui tur thu tarlangin, veng fai inelna leh faina lama mi thahnemngaite lawmman siam an tum thute a tarlang bawk.

He hunah hian Pi RC Lalthianghlimi, MIS Co ordinator, DUDO chuan hapta chhunga hmalak dan tur chipchiar a tarlang a ni.

A hawnna inkhawm hi Pu K. Saitluanga, DIPRO in a kaihruaia, District Sanitation Task Force te, VCP te, Sanitation Ambassadors te leh Media mite an tel a ni.