581/2022-2023
Dated Serchhip the 23rd May, 2022: Vawiin khan Serchhip DC Meeting Hall ah District Level Committee on Green Mizoram te chu an chairman Pi Nazuk Kumar, IAS Serchhip hovin an thukhawm a, June ni 11, 2022 a lo thleng tur Green Mizoram Day, 2022 hman dan tur an rel.

Chairman Pi Nazuk Kumar chuan, hripui vangin Green Mizoram Day hi kum hnih chhung kan hmang mumal thei tawh lova, kuminah erawh chuan mumal taka kan hman theih a beisei awm ta a. Serchhip district ah pawh hlawk taka hman kan tum dawn a ni, a ti.

Committee hian kumin Green Mizoram Day hi Inrinni a nih avangin a hawnna inkhawm hi chu dt.10.6.2022 (Zirtawp) ah Thenzawl Golf Course ah neih ni se tiin a rel a. Thenzawl Golf Course hi a cheimawina lam ai mahin a sir kual vela leilung luangral thei venna atan leh a sira luang Vanva lui tuihna humhalh a nih theih nan a chhehvelah nasa taka thingphun tha an ti a ni. A hawnna inkhawm hi zing dar 11 ah buatsaih a ni anga, Golf Course chhehvel leh Thenzawl YMA Park ah te thingphun hnatlang neih zui tur a ni ang. Tin, a tuk Inrinniah hian kum kalta lam sawrkar office leh pawl hrang hrang ten khaw kar kawng leh hmun danga an lo phun tawhte sam faia a thite phun thar lehna neih zui leh nise an ti. Hemi atan hian Department leh pawl hrang hrangte hnenah an thingphunte sam faia, a thite hmun ruaka a thar phun leh turin ngenna siam an rel a ni.

Meeting ah hian Pu Lalbiakchama Chawngthu, IFS, Member Secretary chuan kum hmasa lama hmalak tawhna te leh kumin atana State Level Committee in ruahmanna a siamte sawi zauna a nei a, kumin Green Mizoram Day thupui atana thlan chu “Thing phun la tuihna siam rawh” tih a ni.

Attachment

  • Loading attachment...