2141/2025-2026

Dated Serchhip, the 16^th September, 2025: Vawiin khan Serchhip District ah Mizoram State AIDS Control Society leh District AIDS Control Committee huaihawtin Intensified IEC Campaign thawhhnihna chu Sub-Headquarters YMA Hall-a programme buatsaihin bul tan a ni ta a. Serchhip DC Pu Paul L Khuma chuan he campaign hi a hawng a ni.

DC Pu Paul L Khuma chuan HIV/AIDS hi kum 1981-a Los Angeles, USA-a an hmuhchhuah atangin vawiin thlengin khawvelin a la buaipui a, Mizoram leh Serchhip District ngeiah pawh tun thlengin min la chenchilh a, tuna a vei mekte bak mi tumahin an kai thar tawh lohna turin, kan zavaia theihtawp kan chhuah a ngai a ni, a ti. HIV/AIDS kai theih dan leh a darh zel dante hrechiang turin kalkhawmte a chah a. Kum 2030 ah chuan HIV hi khawvel tibuaitu Public Health Crisis a nih tawh lohna turin inzirtirna beihpui Intensive IEC Campaign hi kalpui a nih thu sawiin DC chuan sawrkar, khawtlang hruaitu, tlawmngai pawl, mipui mimir thawhhona a pawimawhzia a sawi a. IEC campaign atanga HIV/AIDS nihphung kan zirchhuahte hi mahni in lamah hawnin, chhungkaw titiah te neih thin turin kalkhawmte a fuih a. He natna tihbaiawm tak hi a darh zel lohna tura tanlak a tulzia te, a vei mekte pawh endawng leh thinhrik mai loa khawngaihna leh lainatna kan lantir zawk a tulzia te sawiin Pu Paul L Khuma chuan mi dang hnena sawi darhtu evangelist ni turin mi tinte a sawm a ni.

Serchhip District-ah hian tun dinhmunah mihring awmzat atanga tehin HIV hrik pai mek (nu  naupai chhiar tel loin) za zelah 2.2 an awm a. District dangte nena khaikhinin HIV hrik pai tam lamah Serchhip District hi panga (5)-na a ni. HIV hrik kai zingah hian Drugs-a inchiu thin (Injecting Drug Users) zingah a  hluar ber a. Mipat-hmeichhiat hmansualna atanga kai ten an dawt a ni.

Intensified IEC Campaign hi October thla thleng neih a ni dawn a. Hemi chhung hian programme a tam thei ang ber huaihawt a ni anga. HIV chungchang hi in tinah lutin mipuite zirtir an ni ang.  College leh School-ah campaign neih a ni dawn bawk a. Khawtlang hruaitu VC te nen tangkawpin khaw hrang hrangah zaithiam te sawmin programme buatsaih thin a ni bawk ang.

Vawiin a hawnna programme-ah hian MSACS BTS Assistant Director Pi Lalhmingliani Pachuau chuan inlawmna thu leh HIV/AIDS awareness chungchang sawizauna hun a hmang a. ICTC Counselor Pi Lalnuntluangi Renthlei leh DSRC Counselor Pi F Lalrindiki ten thu thlanbik hmangin kalkhawmte an zirtir a.  ZEP DIC Project Manager Pi PC Zoliansangi’n lawmthu sawiin hun a khar a ni.