No.1203/2021-2022

Dated Serchhip, the 1st July, 2021: Vawiin hian Serchhip DC Meeting Hall ah Serchhip District Disaster Management Authority te leh khawpui chhunga VLTF aiawhte, YMA aiawhte, sumdawng pawl aiawh thenkhatte leh official sawm bikte chuan Covid19 inkhuahkhirhna thar kalpui dan tur leh District level in a rel atana a thudah awmte ngaihtuah hona Pu Kumar Abhishek, IAS, Bawrhsap hovin an nei a, inthlahdulna thenkhat siam a ni.

Chairman Pu Kumar Abhishek, IAS chuan, Serchhip district a medical team te, VLTF te, leh covid19 laka kan him theihna atana thawktu zawng zawngte thawhrimna zarah Serchhip District chu hmun him leh dinhmun tha taka kan din phah mek a an chungah lawmthu ka sawi a ni, a ti a. Kan hmaa hnathawh tur la awmte pawh tha taka thawk zel tura sawmin, mipuite chu Covid19 vaccine kokim taka la tur leh Covid19 laka himna dan (Covid Appropriate Behaviour) te tha taka zawm theuh turin a ngen a ni.

Vawiina meeting hian tun hnaia Serchhip Veng pakhata Covid19 lo darh deuh chhan hi mi pakhat, state pawn atanga lo haw; sawrkar inkhunghranna dan bawhchhetu vanga lo irh chhuak nia hriat a nih avangin dan bawhchhetu hi hremna pek ni se tiin a rel a. VLTF ten anmahni huam chhung theuhvah vaccine la la lote lo indap chhuak se tha tih tlan a ni a, chung miten vaccine an lak theih dan tur ruahmanna siam zui a ni ang. Kum 18 chung lam Adhaar Card leh Document dang nei lo, Vaccine la duhte tan pawh Vaccine hi Serchhip Main Centre ah lak theih dan dap sak an ni dawn a, naktuk atangin Centre hi a duh tan pan theih a ni.

Khawpui chhunga Taxi te chu nitin an service phal sak an ni a, Auto Rickshaw te chu Registration Number tawpa odd leh Even Number te ni inkar thlaka Service tir rem tih sak an ni a, Serchhip leh Aizawl inkara tlan Sumo te pawh an awmna VLTF te hnenah phalna lain an duh ni apiangah tlan phal sak an ni. District chhung khuate leh Serchhip inkar Service Sumo te pawh Service tir remtih sak an ni bawk. Heng passenger phur lirthei te hian Covid19 himna dan (Covid Appropriate Behaviour) te tha takin an zawm vek tur a ni thung.
Eichawp lam chi zuar dawr zawng zawngte leh Hardware dawrte chu nitin zing dar 5 atanga tlai dar 5 thleng inhawn phal an ni a, dawr dangte chu kar khatah ni 4 chhung hawn phal sak an nia, an inhawn chhawk dan tur chu VLTF ten an duan sak ang. Serchhip Bazar pui pawh hawn tawh tur a ni a, chawhmeh leh eichawp te, thlai chi lam zuarte chu nitin an inhawn phal an ni a, dawr dangte chu kar khatah ni 4 an inhawn phal sak thung an ni.

Inkaihhruaina thar kimchang Bawrhsap Order hi Press Release hrana rawn tihchhuah leh a ni ang.