Vawiin chawhnu dar 1:00 khan DC Conference Hall, Serchhip ah Loan Camp (Mega MSME Campaign) neih a ni a, Pi Sangchhin Chinzah, District Bawrhsap chuan he hun hi a hmanpui.

Bawrhsap chuan Bank thuneituten duhsak taka Serchhip District mipuite he hun min hmanpui chu lawmawm a tih thu leh mipuite pawhin lawm nachang hre turin a chah a. Loan kan puk chuan rulh leh ngei tur ani tih hre chung leh kan puk nachhan ang ngei a, dik taka hmanga tura chahin, mahni dinhmun inseam thatna atana hmeng thei ngei turin duhsakna a hlan a ni.

He hunah hian MUDRA, PMEGP leh UD&PA Department, DAY-NULM hnuaia SEP Loan te chu Sanction Order sem niin, UD&PA hnuai ami vek, Street Vendors License pawh pek chhuah nghal a ni bawk.

He hun hi Pu Ralkhuma, Chief Manager, Lead Bank, Aizawl chuan a kaihruai a. Pu Dibyendu Chaudhuri, Regional Manager, Regional Business Office, Aizawl chuan inlawmna thu sawiin Pu Moirangthem Devakishore Singh, Chief Manager, State Bank of India, Regional Business Office, Aizawl chuan lawmthu sawiin hun a khar a. DAY-NULM Serchhip hnuaia Self Help Group hrang hrangte, Bank hrang hranga beneficiary te an tel tha hle a ni.