4727/2025-2026

Dated Serchhip, the 5th March, 2026: Nimin khan Serchhip DC Pu Paul L Khuma hoin DC Meeting Hall ah Health Department hotuten Maternal Death Review Meeting an nei.

Nu nau chunga thi Maternal Mortality Ratio (MMR) hi India Sawrkar chuan tihniam tumin nasa takin tan a la a. State leh District tinah te hmalakna a kalpui mek a. Vanduaithlak takin Serchhip District chhung Khawbelah November 28, 2025 khan nu nau chunga thi pakhat a awm thu meeting ah hian ngaihthlak a ni a. He thil vanduaithlak tak hi engtin nge a lo thlen tih leh hetiang thil a thlen nawn loh nan engtin nge hmalak dan tur tih chungchang an sawiho a ni.

Meeting chuan mipuite hriselna enkawlna lama thawktu Health Care Providers te tana intuaitharna leh infuihtharna hun refresher training neih tir tha an ti a. Naupai laia thatlohna nei - high risk pregnancy nei mek te rang taka damdawi in an pan theih dan tur ngaihtuah chungchang te, hriselna ngai pawimawh kawngah mipuite hriatna tizau tura awareness campaign neih chungchang te an sawi ho a.

District chhung khaw thenkhat, damdawi in awm lohna hmun te leh damdawi in rang takq pan thei lo, harsatna neite chungchang pawh sawiho a ni a. DLAO kaltlangin hmanhmawh ngai bik emergency ah chuan Village Council te thawhpui dan ngaihtuah tha an ti a. Nu nau chunga thi an awm tawh loh nan, chak zawka hma lakna kalpui turin Sawrkar Department dangte nena thawhhona tha neih dan tur te an rel a ni.

He meeting ah hian Sr CMO Dr LP Malsawma bakah Health Department hotute, Serchhip DLAO leh Serchhip District thuneitute an tel a ni.