Tukin zing dar 7:00 khan SP Office tual Serchhip ah duty laia Police nunna chantate hriatrengna ni Police Commemoration Day hman a ni a, anmahni hriatrengna leh zahna lantirna hun hman a ni.

Pu R. Sathiyasundaram, IPS, SP Serchhip chuan thusawiin, October ni 21 hi India ram pumah Police duty laia nunna chante, an duty an hlenchhuah avanga mi sual kut tuara thite sunna leh anmahni hriatrengna ni atana hman thin a nih thu a sawi a. Vawiinah pawh hian September ni 1, 2018 atanga August ni 31, 2019 chhunga ram tana nun hlan Police mi 292 te tan Police Commemoration Day hi hman a ni a, ram tana an nun hlantute hi kan zah a, kan chhuang tak zet a ni, a ti.

Ram tana nun hlantute sunna leh anmahni hriatrengna leh zahna lantir nan 3rd Bn. MAP te chuan Absush/Shok Parade an nei a. SP Office tuala hun hman zawh anih hnu hian Serchhip khaw tlangval, ram tana nun hlantu Pu Biakrotluanga, 2nd IR Bn. kum 2007 a Chhatisgarh a ral hmaa thita chhungte an tawrhpuina lantirnan SP Serchhip leh a thawhpuiten pangpar leh thilpek an hlan a ni.

He hun hmanna ah hian Pu PC Laltanpuia, MPS, Addl. SP, Pu Victor Zothansanga, MPS, SDPO leh Police departmenta thawktute an tel tha hle a. Marian High School Serchhipa Police Cadet te pawhin he hun hi an hmanpui bawk a ni.