No.1768/2021-2022
Dated Serchhip, the 10th August, 2021: Vawiin hian Serchhip DC Meeting Hall ah Chhiatna thlen palha rang taka tanpuina hna thawktu tur Quick Response Team mi 9 te tana ni 4 chhung awh tur training buatsaih a ni a, Pu Kumar Abhishek, IAS, Deputy Commissioner chuan he training hi a hawng.

Bawrhsap chuan Mizoram hi tlangram niin chhiatna chi hrang hrang thleng thei lakah a him tawk lo hle a. Chhiatna thlen palh thuta tanpuina hna thawktu tur QRT neih hi thil tul tak, neih ngei ngei tur a ni, a ti a. Chutiang hna thawktu turte tana training buatsaih a ni chu lawmawm a tih thu sawiin, training hlawk leh tangkai tak ni turin duhsakna a hlan a ni.

He training ni 4 chhung hian Pu Moses Lalthanpuia, Instructor, SYS chuan Quick Response Team mi 9 te chu chhiatna thlen palha chhanchhuahna hna thawh dan chi hrang hrang leh hmanraw hrang hrang hman dante a zirtir ang a. An ni hi district chhunga chhiatna lo thlen palha chhanchhuahna hna thawk tura mamawh an nih chuan DC Office atangin tirh chhuah thin an ni dawn a ni.

Pu Lalmuansanga Ralte, Addl. Deputy Commissioner chuan training hawnna hi a kaihruaia, Pi C. Laltleipuii, SDO(S), Pi F. Lalnisai, SDC , Pi Vanlalduhi Ralte, District Organiser bakah Pu Moses Lalthanpuia, Instructor, SYS ten he hun hi an hmanpui a ni.