Vawiin chawhnu dar 1:00 khan Serchhip Bazar kawnah India rama chengte inpumkhat thar lehna Ni Rashtriya Sankalp Diwas (National Re-Dedication Day) chu urhsun taka hman a ni.

He hun hi Deputy Commissioner leh District Education Office bultuma hman niin, Pu Vanlalchhana, SDEO, Serchhip chuan a kaihhruai a. Pu Lawmawma, District Education Officer Serchhip chuan thu sawiin, kan ram inpumkhatna tihchhiat tuma chhung lam leh pawn lam atanga beih reng anih thu leh ram leh hnam inpumkhatna tichhe thei thilte chu do zel turin mipuite a sawm a. India ram hi dinhmun sangtak thleng chho zel tura inpumkhat deuh deuh a pawimawh a ni, a ti. Ram lian tak, khawsak phung leh nun phung danglam tak tak te, sakhaw hrang hrang bia awmkhawm ni mahila, pangpar huan mawi tak ni turin kawng tinrengah kan inpumkhat a, ram tan kan inhlan thar theuh hi a a tul a ni, a ti bawk.

He ni hi India sawrkar chuan India Prime Minister ropui tak Pi Indira Gandhi thih cham denchhena hman turin a ruahman a. India ram hruaitu  ropui Pu Sadar Vallabhai Patel piancham ni bawkah hian Sawrkar laipui hnuaia Ministry of Home Affairs chuan ram inpumkhatna atan mitin inpe thar leh theuh turin a ngen a ni.

He ni pual hian Serchhip khawpui hmun hrang hrang atangin zirlai naupangten kawng an zawh a, Serchhip Bazar kawnah an intawkkhawm a. Ram tana inpumkhatna tura inhlan thar lehna thutiam chu Pu Ngurthansanga, SDC Serchhip kaihhruaiin zirlai naupangte leh kalkhawmten an sawi rual a ni.