2223/2022-2023
Dated Serchhip, the 7th October, 2022: Vawiin khan Serchhip DC Conference Hall ah Right to Information Week, 2022 hawnna inkhawm buatsaih a ni a. Pu Lalmuansanga Ralte, Addl. DC, bawrhsap mawhphurhna chelh mektu chu khuallian a ni.

Kal khawmten Ro Min Rel Sak Ang Che tih hla sak hona an neih zawhin Rev B. Lalengzauva’n hunserh a hmang a. Chumi zawhah RTI District Resource Person Pu Stephen Laltlansanga Auhmun chuan kalkhawmte hi RTI chungchang tlangpui zirtirna a nei a ni.

He huna khuallian Pu Lalmuansanga Ralte chuan, RTI hmangin khua leh tuiten sawrkar hmalakna tinreng va hriatpui, va enpui theihna thiltihtheihna kan nei hi ram rorelna tha kan neihzia lantirtu a ni a. Mipuite intluktlanna leh zalenna a awm theih nan a tangkai em em a ni. Tunhnaiah RTI zawhnate chu Mobile Phone Application hmanga awlsam taka hman theihin kan han nei leh zel a, thil tha leh tangkai tak tak tih nan mipuiten hmang uar thiam ila a duhawm hle a ni, RTI hmangin ram hmangaihtu khua leh tuiten ram rawngbawl hna thawk zel rawh u a ti. RTI zawhna chhangtu official te pawhin RTI zawhna a hun taka chhan hi kan hna peng tesep a nilova, kan hna pawimawh a ni tih hriaa, a hun taka zawhnate chhang thei tura inbuatsaih a tul hle tih a sawi a. Mitin mai hi vena vil ngai kan nihna chen a awm a, ka hnathawhna kawng tinrenga min venga min vawngtu RTI a awm reng a ni tih hi i hrereng ang u, tiin kalkhawmte a chah a ni.

RTI Week, 2022 hawnna inkhawm hi Pi R. Lalmuankimi, District Resource Person chuan a kaihruai a. Serchhipa SAPIO, SPIO, DAA leh tlawmngaipawl aiawhte, khawtlang hruaitute, chanchinbumite, RTI Activists sawm bikte leh zirlai naupang sawm bikte an tel a, Pu K. Saitluanga, MIS, District Resource Person in lawmthu sawiin a khar a ni.