Vawiin chawhma dar 10:00 khan DC Conference Hall Serchhipah RTI Week hawnna hun hman ve leh a ni. He hun hi October ni 05 a hman tur a nih laiin remchan zawkna avangin vawiin hian hman a ni va ta chauh a ni. Pi K. Vanlalruati SPIO leh SDO (Sadar) ni bawk chuan inkhawm hi kaihruaiin District chhunga department head te leh SPIO leh SAPIO te mai bakah tlawmngai pawl hruaitute leh Media mi te sawm an ni a, khaw chhe hnuaiah pawh misawmte hi an kal tha hle a ni.

He huna khuallian Pu Lalsangliana, District Bawrhsap leh Departmental Appellate Authority ni bawk chuan thu sawiin RTI chu hman tan a nih lai kha chuan official te tana ‘Dan Sakei’ ni turah mi tam takin kan ngai a, official tam tak te pawhin kan lawm lem lo a ni. Mahse han luhkhung tak tak chuan dan tha tak leh tangkai tak, sawrkar leh mipuite thlunzawmtu leihlawn tha tak a ni a ti a, mi dik leh rinawm taka mahni hna thawk thinte tan phei chuan RTI hi dan tha tak lehkanhna thawhte puanzarna tangkai tak a ni thei a ni a ti bawk.

Khuallian chuan Official te chu mipuiten keimahni leh kan hnathawhte atanga hriat duh an neihin thu dik hriattir ngam tura dik taka hna thawk turin a sawm a, Sawrkar Policy hrang hrangah a thawktute hi ‘Lepse ngamin’ hna thawk ila, chu chuan mipuite leh sawrkar inkar a pawt zim anga, sawrkar tha a lo awm thei dawn a ni tiin mipuite hamthatna atana thawk theuh turin kalkhawmte a sawm a ni.

He hunah hian Pu T. Lalhmachhuana MJS, Civil Judge/ Judicial Magistrate 1st Class pawhin  thu sawiin RTI Act leh a hman dan chungchang te, department hrang hranga SPIO leh SAPIO te mawhphurhna chungchangah kalkhawmte zirtirna a pe  bawk a ni.