2114/2025-2026

Dated Serchhip, the 31st October, 2025: Bharat Scouts & Guides Serchhip te chuan tukin zing khan Serchhip khawpui chhung tihfai hnatlang “Cleanliness Drive” an nei a. Serchhip Indoor Stadium tual zawlah an District President Pu Paul L Khuma, Serchhip Bawrhsap chuan faina hnatlang hi a hawng a ni.

Pu Paul L Khuma chuan faina hi mahni-ah a intan tur a ni, tiin, faina pawimawhzia Scouts & Guides ten a taka an nunpui theih nan a fuih a. Anmahni atanga intanin, an chhungkuaah te, an thiante zingah leh an school kalpui te zingah faina leh thianghlimna zirtirtu ni turin a sawm a ni.

Nasha Mukt Bharat Abhiyan (Drug Free India) neih nghal a ni bawk a. Serchhip DC chuan ruihhlo tichhin ve ngai reng reng lo turin Scouts & Guides te chu intiam turin a sawm a, an dam chhung zawnga vawng nung reng turin a chah bawk.

Scouts & Guides kalkhawm te hi hmun li ah inthen darhin Serchhip khawpui kawtthler lun laia bawlhhlawh te an chhar khawm a. An bawlhhlawh chharkhawmte hi UD&PA bawlhhlawh paih motor-in a thiar khawm nghal a ni.
Hnatlang tih tawp nan Serchhip Traffic Point bulah kalkhawm leh niin naupangte chuan drugs that lohzia puanchhuahna hun an hmang a. District Vice President Pu JR Lalhruaitluanga, District Education Officer chuan fuihna thu a sawi a ni.