4058/2024-2025

Dated Serchhip the 3^rd February, 2025: Vawiin khan Serchhip DC Pu Paul L Khuma hoin Serchhip DC Meeting Hall-ah mi pawimawhten State Day of Prayer hman dan tur an rel.  

Mizoram State Day February ni 20 chu Mizoram State Day of Prayer atana hman ni se, Aizawl bakah District Headquarters tinah leh khaw hrang hrangah kohhran bik awm loa a huhoa hman ni se tiin rel a lo ni tawh a. Serchhip District ah pawh khawpuiah leh thingtlang khaw tinah a remchan dan anga hman ni se tiin vawiin meeting-ah hian an rel a ni.  

Vawiin meeting hian Working Committee a din nghal a. Pastor K Ramdinthara, Presbyterian Kohhran Serchhip Bialtu Pastor chu Chairman ah ruat a ni a. Working Chairman atan Serchhip Sub Headquarters YMA President Pu Kawlthuama ruat niin Office Bearers leh Committee member atan sawrkar official te, kohhran hrang hrang aiawhte, tlawmngai pawl aiawhte ruat an ni. He Working Committee hian programme hman dan tur chipchiar an duang dawn a ni. 

DC Pu Paul L Khuma chuan kum kal taa Serchhipa State Day hman a lo nih tawh dan te Committee hmaah hian a sawi lang a.   Kum kaltaa hlawhtling taka hman a lo nih tawh angin Working Committee te kaihhruaina hnuaiah kuminah pawh hlawhtling takin he hun hi kan hman theih a beisei thu a sawi a ni.  

Vawiin meeting-ah hian Kohhran hrang hrang hruaitute, sawrkar official te leh Aizawl atangin State Day of Prayer Committee aiawh te an lo kal a. Pi Chhungi Jahau kaihhruaiin awareness campaign neih nghal niin thusawi bakah tawngtai rualna neih a ni.