3100/2022-2023

Dated Serchhip, the 19^th December, 2022: Vawiin khan Good Governance Week pualin Serchhipah District Level Workshop on Good Governance Practices (Sushan Saptah Prashasan Gaon Ki Aur), 2022 chu DC Conference Hall ah buatsaih a ni.

He hunah hian khuallian Pu Lalmuansanga Ralte, Bawrhsap mawhphurhna chelh mektu chuan sawrkar hnathawkte hi mipuite tana thawk tur, kan hun puma thawk tura lakte kan nih avangin, kan nunah kan hna a hmasak ber a ngai a. Ka tihtur hmasa ber hi kan hriatchian chuan hnathawktu tha kan ni mai dawn a ni. Kan hna aia ngaihpawimawh zawk hna dang kan neih a rem lova chutiang kan nei a nih chuan kan hna kalsanin chu chu kan pan ngam mai a tha zawk awm e, tiin sawrkar hnathawkten an hna an ngaihhlut a tul thu a tarlang a. Ram tha leh hmasawn neih kan duh a, chutiang nei thei tur chuan hnathawktute hian kawng tam takin mawh kan phur a ni, a ti a ni.

He hunah hian Pu Lalhruailiana Zote, MCS, SDC chuan "Good Governance Initiative - DC Online" tih thupui hmangin;  Serchhip district chhunga mipuite tana awlsamna a awm theih nana Online hmanga Deputy Commissioner Office in Certificate hrang hrang a pek chhuah dan sawifiahna a nei a. Serchhip district ah Village Council 54 an awm laiin Common Service Centre 77 an awm a, khaw 5 ah Common Service Centre an awm lo thung a, khaw tam takah CSC hi pakhat aia tam an awm tihna a ni. DC online atang hian Income Certificate 2503, Residential Certificate 1438, Permanent Residential Certificate 55 leh Tribal Certificate 1717 an Issue tawh a ni. 

Pi F. Lalnisai, MCS, SDC pawhin Good Governance Initiative- Visit of Schools tih thupui hmangin tun hnai maia Serchhip Deputy Commissioner officer ten District chhunga sawrkar school hrang hrang 129 an tlawh dan leh heng school ten hma an sawn theih nana hma an lak dan tlangpui sawina hun a hmang ve bawk a ni. Thusawi te an ngaihthlak zawhah kalkhawmten Good Governance chungchang sawihona an nei zui a ni. 

Government of India chuan December ni 19 atanga ni 25 inkar hi Good Governsnce Week atan a puanga, he mi chhung hian tihtur (activity) hrang hrang rawn duangin, ni 23 khi Workshop on Good Governance neih ni turin a ruahman a ni. Amaherawh chu ni 23 hi Krismas a hnaih tawh em avangin vawiin hian Workshop bik hi hman a ni a, Serchhip a Head of Offices te an kal tha hle a ni.