2541/2025-2026

Dated Serchhip, the 5th December, 2025: Vawiin khan Serchhip DC Pu Paul L Khuma hoin Serchhip khawpui chhunga vawksa man (rate) bithliah bawhchhiaa, a mantoa lo zuarte chungchang sawihoin Serchhip DC Meeting Hall-ah thutkhawm pawimawh neih a ni.

Serchhip District Level Committee (DLC) on Fixation of Price of Meat, Vegetables and Fruits chuan November ni 28, 2025-ah “Thil man sang zel ngaihtuahin vawksa man chu kumin December ni 13 atangin Serchhip khawpui(Town) chhungah kg ah ₹450 ni tawh se”, tia a lo rel tawh angin December ni 13 (Inrinni) atang hian Serchhip Town chhungah chuan Vawksa hi kg ah cheng 450 hisapa zawrh tawh tur a ni a. Hemi hma zawng hian rate ding lai cheng 400 hi hman chhunzawm tur a ni.

Serchhip District chhung khaw dangah chuan vawksa hi December 13 hmalam leh hnu lamah pawh, thuneituten an tihdanglam hma chu, vawksa man hi kg ah cheng 400 a ni chhunzawm zel dawn a. Mimal emaw pawlhoin emaw, vawksa man an duhzat bithliah hi The Mizoram Market (Regulation and Facilitation) Act, 2022 bawhchhiatna a nih avangin hrem theih an ni tih chu meeting ah hian sawilan nawn leh a ni a. Pawisafai cheng 1000 thleng chawi tir emaw thla thum lung in tan emaw, a pahnih hnih emaw; thlai/sa zawrhna seat hloh emaw; thil zawrh lai laksaka hrem theih an ni. Sa, thlai leh thei zawrhna rate tihdanglam duhte chuan khawtlang hruaitute kaltlangin thuneitute hnenah thlen tur a ni.

The Mizoram Market (Regulation and Facilitation) Act, 2022 bawhchhia mi thenkhat an awm tih hriat niin heng mite chungah hian dan anga action lak a ni dawn a. Thuneituten an chungchang thu hi Danin a sawi angin an ngaihtuah dawn a ni.

Meeting chuan dan kalha, mimal emaw pawlhoin thil man tisang an lo awm thin chu pawi a tiin, a la thutak hle a. Hetiang thil thleng hria an awm a nih chuan dan leh thupek kengkawhtute hnena thlen thin turin an ngen a ni.

Vawiin meeting-ah hian District thuneitute, police te, YMA leh Joint VC aiawhte an tel a ni.