4914/2025-2026  

Dated Serchhip, the 18^th March, 2026: Nimin khan Serchhip DC Pisapui Hall ah Bawrhsap Pu Paul L Khuma hoin World Consumer Rights Day 2026 an hmang a. Kumin thupui hi Safe Products, Confident Consumers tih a ni.

DC Pu Paul L Khuma chuan mi tinte hi consumer vek kan ni vek a, consumer ten kan dikna chanvo kan hriat a pawimawh em em a ni, a ti. Thil zuartuin a duh duhin thil man a tisang thiang lo a, thil kan leiin MRP kan en thin tur a ni, tiin, MRP aia sanga hralh an awm chuan Consumer-ah thlen nachang hriat a tul a ni, a ti. Thil diklo ti kan hmuh chuan thuneitute hnena thlen hi mipuite mawhphurhna a ni, tiin DC chuan

Sawrkar kut ringawtah innghat lovin, Vantlang Viltu kaltlang pawha thlen theih a nih thu leh hmang tangkai se a duh thu a sawi a. Mi tinin dikna chanvo kan nei a, kan dikna chanvo humhalh turin Dan hnuaiah thuneitute nen i tang tlang ang u, DC chuan a ti bawk.

Serchhip District Consumer Association hi Mizoramah hma la tha ber te zinga mi niin kum 2021 ah Minister Award an lo dawng tawh a. Eirawngbawlna Gas-ah Serchhip hi a khaw pum huapa Home Delivery tihlawhtling thei hmasa ber an ni. Mipui (consumer) ten harsatna an tawh te leh complaint an thehluh te rang taka bawhzui nghal zel a ni a. Kum 2025 chhungin District Commission thubuai 12 lut zingah 11 chinfel a ni a, case 1 erawh a pu luttu a inhnukdawk leh a ni. Serchhip District huamchhunga Consumer Branch 3 hnenah Digital Weight Scale pek an ni a. Aadhaar Card chhuak theilo te hmalak sak an ni a. College/Institution pathumah Consumer Cell/Club din a ni. Kum 2025 chhungin hmun hrang hrang 11 ah Consumer Awareness Campaign neih a ni a. TRAI ah registration dil mek niin March 25 ah verification an rawn nei dawn a. Register theih tura pawm an nih chuan Aizawl dawtah TRAI-a in register thei hmasa ber an ni dawn a ni.

Nimin programme hi District Civil Supplies Officer Pu R Zirliana, District Consumer Protection Council Member Secretary ni bawk chuan a kaihruai a. Legal Metrology Inspector Pu Johny Zonunmawia, Chhiahtlang Consumer Union President Pu R Chhuanthanga ten thu an sawi a. Serchhip District Consumer Association Secretary Dr Laldinpuia’n report a pe a. Serchhip District Consumer Association President Pu RL Chhuanawma’n lawmthu sawiin hun a khar a ni.