Vawiin chawhma dar 11:00 khan PHE Department & Swachh Bharat Mission (Gramin), Serchhip District huaihawtin New Serchhip YMA Hall-ah World Toilet Day 2018 hmanna leh Serchhip District chhunga Swachhagrahi (Village Sanitation Surveyor/Door to Door Campaigner) te tana training buatsaih a ni.

He hunah hian Er. F.Lalsanglura, Sr.EE chuan, World Toilet Day chu kum 2013 atanga hman tan anih thu leh mihring hriselna atana êk in pawimawhzia inhrilhhriatna hun atan hman thin anih thu a sawi a. Ek in tha hman hian naupang kum 5 hnuai lam nunna tam tak kan chhanhim tihna a ni, a ti. Serchhip District chu pawna inthiar awm lohna khua a ni tawh a(Open Defecation Free) He nihna hi chhawm nung zel turin VC leh khawtlang hruaitute leh Department-a thawktuten hma an lak chhoh zel a ngai a ni, a ti bawk.

He hun hi Pu H.Lalhunthara, JE, PHED chuan a kaihhruaia, District chhunga khaw hrang hrang atanga Swachhagrahi kalkhawm ten faina kawnga an khua-in hma an lak dan te sawiin, chawhnu lamah Serchhip District chhunga Swachhagrahi (Sanitation Surveyor & Worker) tura ruatte tan Samuel Lallawmzuala, District Coordinator, SBM (G) chuan zirtirna a pe leh a ni. He hunah hian Swachhagrahi te bakah tualchhung thuthar thehdarhtute leh Department thawktute an kalkhawm a ni.