No.4335/2021-2022
Aizawl, the 21st March 2022 : Serlui bialtu MLA Pu Lalrinsanga Ralte, Vice Chairman, Rubber & Allied Crops Development Board ni bawk chuan vawiin khan a bial chhung mi IIT (Indian Institute of Technology)-a zir tura inziak tling Vanlalnunmawia Ngente S/o Lalmalsawma Ngente, Buhchangphai, tuna Pachhunga University College-a VI Semester (Chemistry) zirlai chu lawmpuina thilpek pawisa fai Rs. 50,000/- (Singnga) a office-ah a hlan.

India rama zirna in tha ber te zinga mi IIT te hian kumtin MSc zir tur entrance test - Joint Admission for Master (JAM) hi India ram hmun hrang hrangah an buatsaih thin a, Vanlalnunmawia Ngente pawh he entrance-ah hian a tling a ni. Serlui bialtu MLA chuan a bial (Serlui A/C) chhung mi JAM inziak tling an awm thei chu lawmawm a tih thu a sawi a. A bial chhungah zirnain hma a sawn theihna atan theihtawp chhuahin hma an lak mek thu sawiin an bial chhung zirna in leh zirlai ten hma an sawn theihna tur a nih chuan theihtawp chhuah a inhuam thu a sawi a. MLA a nih chhunga All India service leh Central service - a pakhat tal a bial chhung mi an luh hi a duhthusam a nih thu a sawi. "Kan bial chhung mi, zirlai thiam thei, tanpui ngai leh puih awm ngawih ngawih an awm chuan tanpui ka inhuam reng a ni," a ti.

Rubber & Allied Crops Development Board Vice Chairman chuan sawrkarin zirnain hma a sawn theihna atan theihtawp chhuaha hma an lak mek thu a sawi a. Zirtirtu indaihlohna phuhruk turin zirtirtu pawh SEDP atanga lak belh mek zel a nih thu sawiin, school building tha lo te pawh sawrkarin a thawm tha mek zel a. Zirnain hma a sawn theih nan sawrkar chuan ruahmanna hrang hrang an kalpui mek a ni, a ti bawk.

Pu Lalrinsanga Ralte hian MLA a tlin hnu kum 2019 atang khan a bial chhung school atanga HSLC leh HSSLC distinction-a pass te hnenah kumtinin lawmpuina atan laptop a pe thin a, Vanlalnunmawia Ngente pawh hi kum 2019 khan laptop a lo pe tawh bawk a ni.

Attachment

  • Loading attachment...