Mizoram University mithiamte hmanga Consultative Committee for NLUP(CCN) in NLUP hnuaia serthlum chin eizawnna dinhmun an zirchianna, “Study on the sucess and impact of NLUP under Horticulture Sector in Mizoram : Mandarin Orange” report chu vawiin khan Chief Minister Pu Lal Thanhawla’n NIB conference hall-ah a tlangzarh.

Serthlum hi NLUP hnuaia leilung behchhan eizawnna ah beneficiary tamna ber niin research mumal leh rintlak tak behchhana report hi buatsaih a ni a. District 8 tuam chhuakin khaw 35 ah zirchianna hi neiin Horticulture hnuaia serthlum beneficiary 8538 zinga 6565 te dinhmun atangin CCN report hi siam a ni.

He zirchianna atanga lo lang chu NLUP kalpui hnuah tlangram lo neihna hmun leh tlangram lo neia eizawngtu chhungkaw zat chu tih tham takin a tlahniam ve ve a. Mizorama chhungkaw za zela 66.44% tlangram lo neia eizawng chu 46.14% ah a tlahniam a, chhungkaw khatin lo an vahna hmun chu 22.52% zelin a tlahniam bawk a ni. Hemi rual hian leilet a eizawng chhungkaw awm zat chu 16.19% atangin 27.20% ah a pung chho thung a. Tlangram lo neia thawktu labour zat chu 47.69% atangin 29.54% ah a tlahniam a. Leilet neitu labour zat chu 18.17% atangin 31.14% ah a pung ve thung a. Beneficiary te zingah bank account nei 46.81% atangin 98.24% ah a pung a, Serthlum phun zawng zawng 68.35%   chu an nung tha in puitling thei tura ngaih a ni. NLUP hnuaia serthlum chinna hmun hian ram 3100 hectare a khuh a. Kum 2017 atanga thar tan tura chhutin kung khatah pum 48 chauh pawh rah se, kum 2017 hian Mizoram serthlum thar chhuah chu 1095 MT in a pung ang a, 2020 ah chuan 7838 MT a pung turin chhut a ni bawk. Hetih rual hian serthlum beneficiary 25% te chuan an thlai 50% aia tam hloh tawhin an eizawnna thlan chu an hlawhchham pui tawh a ni.

He report ah hian serthlum chingtuten an eizawnna an hlawhtlin pui theihna tura rawtna pawimawh tak tak tarlan tel a ni a. Chumi zingah chuan beneficiary te tlangram lo neiha an kir leh lohna turin an thlai puitlin chhung eizawnna tur ngaihtuah sak te, serthlum chawmna tur tui lakna ngaihtuah sak te, thlai thar hralhna tur kawng lo sial sak te, beneficiary ten sum pukna tur an hmuhna tur kawng ngaihtuah sak leh thil dang eng emaw zat a tel a ni.

Chief Minister Pu Lal Thanhawla chuan CCN in hun reilo te chhunga report belhchian dawl tak mai an chhawp chhuak chu lawmawm a tiin heta tang hian NLUP enkawltu te tan hmabak tih tur tam tak a lang a ni, a ti a. Kut hnathawktu tan pawh thu lawmawm leh phurna pe tu a ni ngei ang tih a beisei thu tarlangin CCN in rawtna a siamte chu ti puitling turin theih tawp chhuah zui a ni ang, a ti a. NLUP line department zingah pawimawh lo a awm lo tiin beneficiary te kaihhruai leh enkawl kawngah line department zawng zawng te chu in phur chhuah tur leh thahnem ngai taka NLUP hlawhtlin nan thawk chhunzawm turin a chah nawn leh a ni.