Vawiin khan NLUP Implementing Board Vice Chairman Pu P.L Thanga hovin Horticulture Department Committee room-ah Farmer Field School (FFS) curriculum development workshop ni thum awh tur hawnna inkhawm neih a ni.

NLUP bul tuma UN Joint Initiative Programme Mizorama kal mek hnuaiah Food and Agriculture Organisation (FAO) nena thawk hovin Horticulture Department chuan Farmers Field School (FFS) a din a. Hetah hian serthlum (mandarin orange) leh lakhuihthei (pineapple) bika zir bingna neihna tur leh huan neitute pui thei tura ruahmanna siam a ni a. Pu P.L.Thanga chuan Mizoram tana FAO hmalakna ah lawmthu sawi pahin UNO in khawvel pum hmasawnna tura kum 2030 thleng atan agenda thar a chhawp chhuah, kumin September 25 a tlangzarh ah sustainable development atana ruahmanna a siam leh kalpui dan tur a tarlan chu NLUP hnuaia hmalakna hi a ni, a ti .

FFS in a tum ber chu ei leh bara Mizoram a lo intodelh theih nan huan lo ram neituten hlawk zawka an thar theihna tur ngaihtuah a ni a. Workshop ah hian tlangpang lo neih dan MISALT te, thei thar tam dan te, huan ro siamna atana lei leh tui hman dan te, man man zawka thei thar te hralh chhuahna tur te zirho a ni ang.

Hawnna inkhawm hi Horticulture Director Pu R.Zotawna’n a kaihruai a. FFS Expert, FAO aiawh Dr. Konda Chavva Reddy chuan workshop neih chhan leh nihphung tlangpui a sawi. Workshop neih chhung hian Horticulture Department, Mizoram University, KVK, FAO atanga lokal mithiamten hun an hmang dawn a ni.