Vawiin khan Kolasib DC Pi Niharika Rai, IAS hovin a office chamber-ah Hmeichhiate chunga mawilo taka chetna (sexual harassment) ven dan tur ngaihtuahtu District Level Complaint Committee an thukhawm a. Supreme Court-in din tura a tih anga he Committee hi din a niin chak taka hma lak nghal an tum a ni.

Vawiin Committee neih hmasak berah hian a tihtur duan sa terms of reference te sawi ho a ni a. District chhunga hmeichhia te, Office leh zirna In-a miten hmeichhiat mipatna  kawnga tihbuai/ nawr luih an tawk em tih zir chiang turte, an lo tawk a nih chuan Dan in an hmakhua thui tak a hum sak dan hrilh hriatna Awareness siam te, chutianga tihluihna tawkte (victims) te tanpui  te chu tihtur langsar zualte an ni a. Hemi bawhzui hian Committee chuan hma lak nghal nise an ti a ni.

DC Chairman-na hnuaia  Complaint Committee hnenah hian hmeichhiat mipatna kawnga complaint nei hmeichhiate chuan an lawmlohna te an thlen thei ang a, a tul angin hma lak a ni dawn a ni.

Kolasib District Level Complaint Committee for Prevention of Sexual Harassment hi DC chairmanna hnuaia din niin member te chu SP, Kolasib; Representative of 1^st Class Magistrate, District Court; CDPO; YMA leh MHIP aiawh te an ni.

 Hetih lai hian sawrkar-in a din, man awm lova harsatna tawkte tana rawn theih District Legal Aid pawh pan theih reng an ni a. Harsatna leh manganna neite tan District Court ah Dan hremi te hi an awm reng a ni.