Nimin khan Agriculture Minister Pu H. Liansailva chuan Union Minister for Agriculture Pu Sharad Pawara'n, NE Agriculture Minister khawmpui neihna a a sawm angin, Delhi-ah Union Minister hi a hmu a, Pu Vanhela Pachuau, Chief Secretary, Pu P.L. Thanga, Vice Chairman, NLUP Implementing Board, leh AH & Vety, Agriculture, Horticulture hotuten Pu Liansailova hi an tawiawm a, darkar 1 ½ an inkawm.
Agriculture, Horticulture leh AH & Vety Department te mamawh hrang hrang Mizoram hotute chuan Pu Pawar hi an hrilh a, Livelihood leh Food Security atan Zoram mipui mamawh phuhruk dan tur an sawite chu ngun taka ngaithlain, a puih dan kawng hrang hrang awm theite sawi hmuhin, theihtawp lo chhuahpui nghal an nih tur thu Union Minister hian a lo hrilh. Pu Liansailova te hi Union Minister in phur taka hmalakpui a inhuamna ah an lawm hle.
Palm Oil, Grape, Passion Fruit (Sapthei) leh vawkvulh bakah hmalakna hrang hrangte a hmun a en turin, Central Sorkar Agricuture Secretary leh mi pawimawh te ni 11.4.2011 ah a tirh tur thu leh amah pawh ni 12.4.2011 ah Mizoram-ah lokalin Chief Minister Pu Lal Thanhawla te nen hmalak dan tur sawi ho nise a duh thu Pu Sharad Pawar chuan a lo hrilh a ni. Mizoram Minister leh a tawiawmtute hnenah Agriculture Ministry atangin sum engemaw zat an pek tur pawh a lo hrilh bawk.
