Youth Affairs and Sports Ministry bultumin North East Youth Festival tum 2-na, April ni 7 atanga ni 9 inkar hian Shillong-ah neih a ni dawn a. He huna tel ve tur hian Mizoram aiawh tur thalai kawng hrang hranga talent nei tha mi 100 aia tamlo thlan chhuah  tur a ni a. Hemi chunchang ngaihtuah hian vawiin khan I&PR leh Sports and Youth Services Secretary Pu R. Lalrinawma hovin a office chamber-ah Sports Department, Art & Culture, Nehru Yuva Kendra leh a kaihhnawih Deptt. dang aiawhte an thukhawm.
Pu R. Lalrinawma chuan North East Youth Festival hi hmarchhak State hrang hranga thalaite inpawh zawk nan leh inunau nana duan a nih avangin Mizoram aiawh a kal tur te pawh a zau thei ang ber, District hrang hrang huapzo tura thlanchhuah a pawimawh thu a sawi a. Chutihrualin  Mizoram aiawh a kal tur an nih dawn avangin uluk taka mi tha bik thlanchhuah a tul a ni a ti bawk.

North East Youth Festival-ah hian Hnam Lam, Hnam Hla, Guitar Solo, Rock Band leh One act play-ah te inel a ni dawn a. Thiamhnang deh (Handicraft) exhibition neih tel tur a ni bawk. Meeting hian Mizoram aiawha kal tur thlanchhuah hna chu  Art &Culture Deptt. leh NYK kutah dah ni se tiin an rel a ni.