1217/2024-2025

Aizawl dated 18th July, 2024: Vawiin chawhnu khan Aijal Club Conference Hall-ah Shri Bhagirath Choudhary, Hon'ble Minister of State, Ministry of Agriculture & Farmers Welfare leh Mizoram Sawrkar hnuaia Agriculture & Farmers Welfare Department-a thawktute chuan inkawm hona hun an nei a. Pi Ramdinliani, IAS, Secretary, Agriculture & Farmers Welfare chuan hun kaihruaiin Mizoram a buh leh thlai thar kawng a hmalakna leh dinhmun hrang hrang, PowerPoint Presentation hmang a entirna hun, Dr. Samuel Lalliansanga, Deputy Director chuan a nei a ni.

Shri Bhagirath Choudhary, Hon'ble Minister of State Ministry of Agriculture & Farmers Welfare chuan ram tihmasawn tur chuan loneitute tih hmasawn hmasak a tul thu sawiin, hemi kawng a hmalakna ah hian Central leh State Sawrkar a thawktute tanrual a pawimawh thu a sawi a. Central leh State Sawrkar hnuai a Agriculture & Farmers Welfare department-a thawktuten ruahmanna siamin an thutkhawm fo a tul thu a sawi. Shri Bhagirath Choudhary chuan loneituten an thil thar chhuahte awlsam zawk leh man man zawk a an hralh theih nan ruahmanna tha siam a ngaih thu te, inkalpawhna leh loneituten an thil tharchhuah rei tak an dah that theihna tur ruahman a tul thu a sawi a, hemi kawng a mamawh hrang hrangte phuhru tur hian Sawrkar laipui chuan tanpui an inpeih reng thu a tarlang bawk a ni. Kuthnathawktute tihmasawn tura mithiam bik awmna, Krishi Vigyan Kendra chu hmang tangkai tur leh loneituten an thawh rah dik tak an hmuh ngei theih nan a tan la turin a fuih a. Union Minister of State chuan loneitute chu ram innghahna pawimawh tak an nih angin an dinhmun chawikang tur a hmalakna ah tan la zel turin kalkhawmte a chah a, loneitute sum dehchhuah a let li a tih pun a nih theih nan thawhhopui ah a sawm bawk a ni.

He thutkhawmna ah hian Mizoram Sawrkar hnuai a Agriculture & Farmers Welfare Department-in Sawrkar laipui scheme hrang hrang a kalpuite tarlan niin July ni 18, 2024 thleng khan PM-Kisan hnuai dilna lut loneitu nuai 2 chuang zingah mi 119259-te chu dawng thei zing a an tel thu te, Mizoram district 3-ah Pradhan Mantri Fasal Bima Yojana kalpui tan tur a hmalak a nih dan te, Farmer Producers Organisation 47 din a nih tawh thu te tarlan a ni a, Pesticides, Fertilizer leh Seed dealer neih dan dinhmun te sawi a ni bawk a. District 7 ah Oilpalm huan siam loneitu 10843 an awm thu leh kumin thleng hian Oilpalm rah 55936 MT hralh chhuah a nih tawh thu he hun ah hian tarlan a ni a, Sawrkar laipui hnuai a scheme chak zawk a kalpui a nih theih nan sum ruahman sa te chak tak a pekchhuah a tul thu sawi lan a ni bawk. Vawiin thutkhawmna ah hian Directorate of Agriculture & Farmers Welfare hnuai a thawktute an tel a, Pu R. Lalnunzira, Additional Director chuan lawmthu sawina hun a hmang a ni.