No.7351/2020-2021

Mizoram hmun dangte rualin Siaha District-ah pawh tukin dar 9 khan Circuit House kawtah, khuallian Pu Kesavan R, IAS, District Bawrhsap hovin Covid-19 inkaihhruaina dan zawm chungin 72nd Indian Republic Day chu urhsun taka hman a ni a. Republic Day Celebration Committee in a lo rel tawh angin, Covid-19 hrileng avangin kumin Republic Day-ah zirlai naupang leh mipui mimir tel lovin, Head of Office-te leh sawm bikten an hmang a ni.Sub-Inspector Ngurthantluanga command-na hnuaiah 2nd Battalion MAP ten Khuallian hi Guard of Honour zahna an lantir a ni.

Khuallian chuan thu sawiin Republic Day vawi 72-na a lo thlen hian Siaha mipui zawng zawngte duhsakna chibai a buk a. Republic Day hi India danpui ‘Constitution of India’ chu pawma ram mipuite tan hman tan ni January 26, 1950 hriatrengna puala neih thin a ni a ti a. Dan ang thlapa rorelna kalphung kalpui leh ramchhunga chengte chu intluktlanna dan hnuaia leng za an nihna tichiangtu Indian Constitution hman tan ni a nih avangin India ram khua leh tuite tan hian a hlu reng a ni a ti bawk. He danpui hian India ramah milian leh mite thlei bik nei hauh lo leh sakhaw hrang hrang bakah hnam nunphung inang lo tak takte zai khata luang za tura min hrutrualtu leh min khaikhawmtu a nih vangin a hlu em em a, khawvel huap pawha mipui duh thlan leh rorelna ram nuam leh ralmuang kan nihna lantirtu pawimawh tak a ni bawk a ti.

Khuallian chuan thu a sawi zelnaah India ramin chona leh harsatna tam tak a paltlang nasa hle a, hetiang hun harsa a tawh lai pawhin ram mipuite inlungrualna leh theihtawp chhuaha hrui khat vuana hmalam an pan tlan thinna chuan rah duhawm tak chhuah zelin harsatna leh chona an tawn ang angte an hneh theih pha thin a ni a ti a. Tuna hripui do mek Covid-19 hmachhawn danah pawh mipuite an inlungrualzia a langchiang hle a, harsatna tam tak an hmachhawn a, sorkar leh khaw mipuite tanrualna a ropuiin he hripui dona kawngah milian leh mite inthleina awm hauh lovin theihtawp chhuah tlanna zarah Covid-19 vei pawh enkawl dam ni zelin a hri leng darh zau zel tur pawh theihtawpin ven theih zel a ni a ti. Siaha district-ah phei chuan hun rei tak Covid-19 hri kai enkawl lai an awm tawh loh hnuah hmanni deuhah khan pakhat kan nei ve leh hlauh mai a, hei pawh hi enkawl dam thuai beisei a ni a. Heng zawng zawng a thlen theihna chhan chu thawktu leh mipuite tanrualna vang a ni a, thahnemngai taka hma kan lak zuizel pawh a duhawm takzet a ni, a ti.

Khuallian chuan vawiin Republic Day lawmnaah hian Covid-19 dona kawnga ral hmatawnga ding – Health department, Police force, MADC department hrang hranga thawktute, DDMA & staff-te, Village Task Force-te leh Tlawmngai pawl hrang hrangte bakah Political party hrang hrang aiawhte,Kohhran hrang hrang hruaitute hnenah hian lawmthu sawiin Covid-19 dona kawnga mimal, pawl, khua leh veng inphal tak tak Siaha district-in a nei hi a ropui a tih thu leh thinlung takin a chhuan takzet thu DC hian a sawi bawk a ni. Hmalam hun hmachhawn turah pawh inlungrualna hi i vawng nung zel ang u tiin Siaha district mipui zawng zawngte a sawm.

Khuallian Pu Kesavan R. chuan sawrkar hmalakna langsar zualte tarlangin Land Acquisition hmalakna kal mekah National Highway-54 kawng zauh leh siamthat hna Kaochao leh Tipa inkar chu zawh a ni tawh a, kawng siam hna hi Rehabilitaion & Resettlement Award hlan a nih hma chuan chhunzawm rih loh tura ruahmanna siam rih a ni tih a sawi a. Health Minister Dr. R. Lalthangliana chuan Damdawi In khum 100 awmna chu January ni 22, 2021 khan Siaha District tan a rawn hawng a; hemi ni vek hian Social Welfare Minister Dr. K Beichhua chuan hmeichhe hleilenna tuarte tluk lailawkna tur hmun ‘ONE STOP CENTRE’ a hawng bawk a ni tih a tarlang. Tunah chuan Siaha mipuite chu district danga damdawi in pan kher ngai lovin mahni khua ngeiah inenkawl thei an ni ta chu a lawmawm takzet a ni a ti.

Mahatma Gandhi National Rural Employment Guarantee Scheme (MGNREGS) scheme hnuaiah kum 2020-2021 chhungin ni 96 inhlawhna neih hman niin mi 16492 hnenah job card pekchhuah a ni a, hna hi 1582 zawh tawh niin 77 hi hna hrang hrang la kal lai mek a awm bawk. State Flagship Programme Socio-Economic Development Programme (SEDP) hnuaiah Agriculture Department-in a kalpui mek Vaimim chin hna chu khaw pathum- Tisopi, Siata leh Zyhno-ah te kalphung felfai zawk leh ruahmanna tha zawk neia kalpui niin loneitu chhungkaw 75 hnenah ram acre 75-a zau buatsaih sak niin vaimim chi tha bakah sprayer, rannung hlo, vaimim dahthatna, bukna leh fun thatna tur leh hmanraw mamawh dangte semchhuah a ni bawk.

Pradhan Mantri Krishi Sinchayee Yojana (PMKSY) scheme hnuaiah 'More crop per drop' chu chak taka kalpui niin awmze nei zawka thlai enkawlna ruahman leh hnianghnar zawka tui hman dan tur inzirtir niin Horticulture Department chuan Drip and Sprinkler hmanga Tomato, Zikhlum, Aloe vera, Hmarcha leh thlai chi dangte enkawl dan tha zawk heng khua - Naotlah, Amobyu CH,Lobo, Tipa, Tipi Ferry, Zyhno, Kaochao leh Siaha town-ah te hian an zirtir bawk a ni. ‘One Nation One Ration Card’ Scheme hnuaiah, Ration card leh Aadhar card zaa 85% chu thlunzawm tawh a ni a. Electronic hmang tangkaia Ration sem/hralh dan kalphung (e-pos) chu Ration semna/hralhna 'Fair price shop' dealer tinah hmang tura ruahmanna siam a ni a, hei hian ration sem leh hralh chungchanga thil felhlel leh dik lo awm thei tura vengin a dawngtu tur dik tak hnenah chauh a thleng thin tawh dawn a ni. Jal Jeevan Mission hnuaia kalpui mek ‘Functional Household Tap Connection’ (FHTC) hi khaw hrang hrang 17-a cheng chhungkaw 2428 hnenah an kawtkaiah tui thianghlim pek an ni tawh bawk a ni.

Vawiin Republic Day lawmnaah hian Covid-19 hrileng kara ‘Beti Bachao Beti Padhao’ hnuaia Frontline Workers hnathawk tha mi 10 thlanchhuahte leh Child Sex Ratio inthlauh lutuk siamthatna kawnga thawh hlawk ber Village Council 2 - Noaotlah-I leh Lopu VC aiawhte hnenah Khuallian hian Chawimawina thuziak leh incentive Cash Prize a hlan bawk a ni. Vawiin  Republic Day vawi 72-na pual hian Orphanage, Home, Jail leh Hospital-ah te thilpek hlan an ni bawk.

Attachment

  • Loading attachment...