2648/2024-2025

Siaha the 22nd October 2024: Addl DC Pu Abraham Beirazi Khithie kaihhruaina hnuaiah vawiin khan DRDO Conference Hall, Siaha-ah District Sensitization on Thlai Thar Market (Under the Mizoram Bana Kaih Scheme 2024) buatsaih a ni a, Mizoram Agricultural Marketing Board (MAMB) member ten sensitisation programme hi an telpui a ni.

Pu Ronald Lalchhuanawma, Member MAMB chuan kalkhawmte chu lawmthu hrilhin vawiin programme chu Hand Holding Scheme 2024 hnuaia thlai thar hralh chungchanga hriattur tul leh pawimawhte, line department-te nena sawiho tura buatsaih a nih thu a sawi. Bana Kaih chu Sawrkar scheme pawimawh tak a ni a, a taka thawktu tur ten he Scheme hnuaia market support a kalpui dan tur ruahmanna awm tawhte an hriatchian a pawimawh hle a ti. Market Support kaltlanga Mizoram Sawrkarin a ngaih pawimawh leh tum ber chu kut hnathawktute'n an thlai tharchhuahte mumal leh man man zawka an hralh theihna tur a ni a, Sustainable market-a awm theihna atan theihtawp a chhuah mek a, thlai thlan bik 4 Sawhthing, Hmarcha, Aieng leh Hmunphiahte a bul tan a nih thu a sawi bawk a ni.

Vawiin thutkhawmah hian Thlai thar hralh dan tur te, thlai chingtute atanga a leitute a thlen dan tur te, Collection centre atanga hralh dan tur te inhrilhhriatna hun neih a ni a. District Agricultural Marketing Committee (DAMC) mawhphurhna hrang hrang leh hmalak dan tur sawi a ni a, zawhna leh chhanna hun neih nghal niin hun hlawkthlak tak hmanho a ni.