1066/2022-2023
Siaha; the 28th June,2022: Vawiin chawhma dar 11:00Am khan Pu Donny Lalruatsanga,Addl.DC office chamber-ah Birth Certificate pek chhuah chungchangah Myanmar Refugee te avangin fimkhur ngaina thil te concern official te nen sawi ho a ni.

Siaha district hi Mizoram district zinga Myanmar Raltlan awm tamna ber kan ni mek a. Raltlan thenkhat ten an anmahni emaw, an fa te emaw tan delay Birth Certificate dil an awm nual tawh thu Executive Magistrate chuan a tarlang.

Birth Certificate hi Nausen pian atanga ni 21 chhungin awmna veng/khua Registrar Birth and Death(RBD), (RBD atan hian Zirtirtu ruat an ni thin) in Birth Certificate a pe chhuak thei a. Pian atanga kum 1 chhungin DRO in fee awm lovin a pe chhuak thei bawk. Kum khat hnu lamah chuan Executive Magistrate hnena Delay Birth Certificate hi dilna theh luh thei a ni a, Executive Magistrate in DRO hnenah a refer leh thin a ni.

Delay Birth Certificate dilnaah hian India khua leh tui an ni ngei a ni tih chian nan Nu leh Pa EPIC bakah VC,Kohhran leh NGO te hriatpuina thil tel tur a ni thin.A diltu hi kum 18 aia Upa a nih chuan amah EPIC bakah Kohhran, VC leh NGO te hriatpuina thil tel tur a ni thin.
Hetiang a ni mek lai hian Myanmar Raltlan ni si, an nu leh Pa atan India khua leh tui mi, EPIC nei te hmanga, Kohhran,VC leh tlawmngai Pawl ten India khua leh tui anga an lo hriatpui te an awm thin a.He thil hian hmalam hunah kan district hi nasa takin a la nghawng thei dawn a ni. A mawhphurtu official te tan pawhin harsatna nasa tak a la thlen thei a ni.Chuvangin vawiin meeting chuan DRO office pawh fimkhur tak a Birth Certificate pe chhuak turin a ngen a, Dik hlel taka Birth Certificate hi pek chhuah a ni a, man chhuah a nih leh si chuan Registrar bakah a hriatpuitu VC,Kohhran leh Tlawmngai Pawl laka pawh Dan anga hremna lek kawh thei a ni, tih hi mitinin hria se tih vawiin meeting chuan a duh a ni.

Birth Certificate ber an neih tawh chuan India khua leh tuiah kan siam tawh tihna a ni dawn a, Electoral Roll-ah pawh an inthun theih zel tawh dawn a ni, tih vawiin meetingah tarlan a ni.

He mi chungchang hian Executive Magistrate atangin VC, Kohhran leh NGOs te hnenah pawh hriattirna mulmal tak pek vek tum a ni a. DRO office atang pawhin veng/khaw tina DRB te hnenah Birth Certificate pek chhuah kawngah fimkhur taka kalpui tura hriattirna pek chhuak leh vek tum a ni bawk.