615/2025-2026

Dated Siaha, 28th May, 2025: Vawiin chawhma khan DC Mini Conference Hall, Siaha-ah District Consultative Committee (DCC), District Level Review Committee (DLRC) leh District Level Security Committee (DLSC) for the Quarter Ending March, 2025 thutkhawmna neih a ni a, Pu Abraham Beirazi Khithie, Additional Deputy Commissioner in he hun hi a kaihruai.

Pu Abraham Beirazi Khithie chuan kalkhawmte lawmna thu sawiin line department leh bank in thawhhona tha tak an neih a pawimawh hle tiin ram leh hnam tana hnathawk an ni tih inhre thar turin a chah.

Pu J M Soren, Lead Bank Office-a Lead District Manager & Convener (Lawngtlai & Siaha) chuan agenda sawifiahna neiin sawihona hun a kaihruai nghal a, March 3, 2025-a meeting minute chu member-te hnenah ni 15.03.2025-ah sem vek anih thu sawiin minute pawmna neih hmasak a ni. Hemi hnu hian kumhlui lama Siaha district chhunga bank hrang hrang hnathawh thlirletna neih niin zawhna leh chhanna neih a ni bawk. Kum thar lama hmalakna tur hmachhawp hrang hrang line department leh bank-a thawktute nen huamzau takin sawiho nghal a ni.

Siaha district chhungah hian Public Sector bank – 1, Private Sector bank – 2, Regional Rural Bank – 3 leh State Cooperative bank – 2 niin ATM Booth 7 a awm bawk. Bank, Lead Bank leh CFL kal tlangin mipui hnena sum hman leh enkawl dan inzirtirna (financial literacy campaign) ṭum 55 buatsaih niin mi 1177-in an chhim tih tarlan a ni bawk.

Bank-a mipuiin sum an dah luh (deposit) zat za zela bank-in mipuia sum an puktir (credit) zat chhutna, Credit/Deposit Ratio-ah Siaha District-a bank-te chuan March, 2025-ah 86.02% an nei tih tarlan niin, December 2024 (97.26%) nena khaikhinin CD Ratio hi 11.24 %-in a tlahniam a ni.

He hunah hian kum 2025-2026 chhunga Siaha District-a bank-te'n sector hrang hranga loan an pek chhuah dan tur - Annual Credit Plan (ACP) ruahmanna thlira sawiho niin tha tih tlan a ni. Vawiin hun hmannaah hian line department official-te bakah bank aiawh an tel.