2318/2025-2026

Dated Siaha, 20th November, 2025: Vawiin chawhma dar 11 khan DC Mini Conference Hall, Siaha-ah, District Consultative Committee (DCC), District Level Review Committee (DLRC) leh District Level Security Committee (DLSC) for the Quarter Ending September, 2025 thutkhawmna neih a ni a, Pu Vanlalchhuanliana, SDO (S) in he hun hi a kaihruai.

Pu J.M. Soren, Lead Bank Office-a Lead District Manager & Convener (Lawngtlai & Siaha) chuan agenda sawifiahna neiin sawihona hun a kaihruai nghal a, August 28, 2025-a meeting minute chu member-te hnenah ni 17.09.2025-ah sem vek a nih thu sawiin minute pawmna neih hmasak a ni. Hemi hnu hian hun hmasa (quarter) lama Siaha district chhunga bank hrang hrang hnathawh thlirletna neih niin zawhna leh chhanna neih a nih bakah hmalakna tur hmachhawp hrang hrang line department leh bank-a thawktute nen huamzau takin sawiho nghal a ni.

Siaha district chhungah hian bank chi hrang hrang an awm a, an hming leh branch neih zat chu Public Sector bank – 1, Private Sector bank – 2, Regional Rural Bank – 3 leh State Cooperative bank – 2 niin ATM Booth 6 a awm bawk. Bank, Lead Bank leh CFL kal tlangin mipui hnena sum hman leh enkawl dan inzirtirna (financial literacy campaign) ṭum 52 buatsaih niin mi 1413-in an chhim tih tarlan a ni bawk.

Bank-a mipuiin sum an dah luh (deposit) zat za zela bank-in mipuia sum an puktir (credit) zat chhutna, Credit/Deposit Ratio-ah Siaha District-a bank-te chuan September, 2025-ah 93.46% an nei tih tarlan niin, June, 2025 quarter (91.48%) nena khaikhinin CD Ratio hi 1.98%-in a tam a ni.

Sawrkar laipuiin ram mipuite tana social security scheme a siamah July – September, 2025 chhungin Siaha district mipuite PMJJBY-ah mi 4971, PMSBY-ah mi 7652 leh APY-ah mi 881 an inziaklut a. Hemi hun chhung vek hian annual credit plan, priority sector hnuaiah education loan mi pahnih hnenah nuai khat singkhat sangkua (1.19) leh nuai thum (3), a vaiin nuai li singkhat sangkua (4.19) pekchhuah niin target mi 18 atanga chhutin pekchhuah tawh zat chu 6.65% a ni. PMEGP hnuaiah mi 13 hnenah nuai sawmsarih pakhat singnga sangkua (71.59) pekchhuah niin, DAY-NRLM/MzSRLM hnuaia self-help group 40 hnenah nuai za sawmthum paruk singsarih sangnga (136.75) pekchhuah a ni bawk.

Bank hrang hrang hmalakna thlirho anih hnu hian sawihona neih chhunzawm a ni a. Siaha District chhunga bank zawng zawngte quarter hman mek tawp hma ni 15 hma lamah an bank data theuhte Lead Bank Office-ah thehlut thin tura ngen an nih bakah pawisa thir hman chungchanga harsatna awm leh sumdawng thenkhatin pawisa nawi kir tur aia an thil zawrh an pek thin chungchang sawiho a ni.

Vawiin hun hmannaah hian line department, NABARD, RBI, CFL- official bakah bank aiawh an tel a, Pu J.M. Soren, Lead Bank Office-a Lead District Manager & Convener (Lawngtlai & Siaha) in lawmthu sawina neiin hun hman tihtawp a ni.