801/2025-2026

Siaha the 10th June 2025: Vawiin chawhnu khan DC Mini Conference Hall, Siaha-ah District Planning Committee (DPC) te chu an Chairman leh District Bawrhsap ni bawk Pu VL Hruaizela Khiangte kaihhruaina hnuaiah an thukhawm a, Dr K Beichhua, MLA Saiha A/C leh Pu K Hrahmo, MLA Palak A/C bakah MADC CEM Pu M Laikaw ten he hun hi an hmanpui bawk.

39-Saiha A/C Bialtu MLA Dr K Beichhua chuan Siaha District hmasawnna tura theihtawp chhuah thin official-te chungah lawmthu a sawi a, vawiin thutkhawm chuan department-te thahnemngaihna leh inlungrualna a pholang chiang hle tiin district tan thahnemngai taka thawk chhunzawm theuh turin a sawm a ni.

District Bawrhsap Pu VL Hruaizela Khiangte chuan MLA te bakah MADC CEM leh kalkhawmte chungah lawmthu a sawi a, hun tepter tak karah project tam tak thehluh a ni chu a lawmawm hle a ti. DPC chu district hmasawnna atana hmalakna tur hrang hrang sawihona a nih angin a pawimawh hle a, District Level a project proposal lut te chu State Level Executive Committee-ah a lut leh anga, chuta project pawm (approved) te Ministry level a luh leh tur thu a tarlang. Art 275(1) hnuaia project te chu ST te hamthatna tura duan a nih angin department tam tak a huam a, district hmasawnna turin proposal te chu fimkhur taka siam a, theihtawp chhuah a tul, a ti a ni.

Siaha District Planning Committee-ah hian Pu R Lalfakzuala, RO, P&PI Department, Mizoram chu Member Secretary a ni a, Addl Member Secretary chu District Research Officer, (Economics & Statistics) niin PD, DRDO Siaha chu District Coordinator a ni bawk.

Vawiin thutkhawmah hian Mizoram sawrkar hnuaia official te, Sr LAO, LAD, MADC, Lead District Manager, Siaha District-te leh NGO aiawhte a tel a ni.

He meeting hi Art 275 (1) hnuaia tribal te hamthatna tura hmasawnna ruhrel hrang hrang ngaihtuahho tura neih a ni a, department hrang hrang atanga project proposal an thehluhte zirchian niin sawiho a ni. Project thehluttu Department ten an project sawifiahna te neiin District tana hamthatna leh hmasawnna a thlen theih dan tur te sawiho nghal a ni.