3107/2022-2023

Siaha, December ni 19 : Vawiin chawhnu dar 01:00Pm khan DRDA Conference Hall, Siaha-ah Good Governance Week-2022 'Prashashan Gaon Ki Aur' tih thupui hmangin hawnna hun hman niin, programme hi Pi Lalnunmawii, Addl. Deputy Commissioner, Siaha in a kaihruai a ni.

Vawiin Good Governance-2022 hawnna a khuallian Pu Lalsangliana, Siaha District Bawrhsap chuan thu sawina hun hmangin, vawiin ni-a he Ni pawimawh tak hmang tura lo kal te chawnglawmna thu a sawi a. Good Governance hman hunpui ber tur 23.12.2022 erawh keini lam tan hman a rem chiah thin lova, Office khar lai leh Krismas chawlh runpui a ni thin avangin vawiin hi kan hotuten rem an ruat ta a ni, a ti. Good Governance hi Central Sawrkar leh State Sawrkar te chuan an ngai pawimawh hle a ni tiin, he Good Governance tihhlawhtlingtu tur te chu keini sawrkar hnathawk te hi kan ni a, hun engemaw kal ta ah pawh khan he Ni pual hian 'No Meeting Day' te kan lo hmang thin a. He ruat bik niah hian mipui lam te nen duhthawh leh inpawh tlang taka indawrna hun te kan hmang tawh thin a ni, a ti bawk. Tahrik ni 10-18.12.2022 chhung khan Preparatory Phase hman a lo ni tawh a, vawiin ni atang hian Implementation Phase kan tan leh chiah a ni tiin, hemi Week chhung hi Mipui, mi chanhai leh tanpui ngaite tana luanchhuahna kar a tan hmang theuh ila, taima tak leh dawr nuam tak, rinawm taka kan hna theuh thawk zel turin intiamna leh mite tana luanchhuahna niah hmang theuh ang u, tiin fuihna thuchah tha tak tak sawina hun a hmang a ni.

Department thlan bik heng a hnuaia mite hnen atang hian Presentation on Good Governance pekna hun an hmang :-

1. Dr. Lalnunziri, Chief Medical Officer, Siaha hnen atangin kum 5 chhunga an hmalakna leh an hlawhtlinna hrang hrang te Power presentation hmangin kalkhawm te hnena phochhuahna hun a hmang.

2. Pu Vanlalchhuanga, District Civil Supplies Officer, Siaha pawhin an Department hmalak tawhna te, an hlawhtlinna leh an hmachhawpte presentation pekna hun a hmang bawk.

3. Pi Jenny Lalthanpuii, HA, District Education Office, Siaha pawhin an Department hnuaia hmalakna hrang hrang leh an hlawhtlinna te tarlangin, an hmalak zel dan turte sawina hun a hmang ve bawk a ni.

Programme kar lakah zaithiam tak Nl. H. Lalruatpari hnen atangin zai mawi tak ngaithlak a nih hnuin Pi Rochuangkimi Khenglawt, SDO (S) chuan lawmthu sawina hun hmangin vawiin programme a khar ta a ni.