2107/2025-2026

Siaha the 12th September 2025: UD&PA buatsaih Mizoram khawpui fai inelna Mizoram Cleanliness Competition (MCC) -2025 khuhhawnna (kick off) chu vawiin khan DC Conference Room, Siaha-ah UD&PA District Project Officer, Pu Vanlalchhuanliana, SDO (S) ni bawk kaihhruaina hnuaiah neih a ni.

MCC - 2025 khuhhawnnaah hian Addl DC Pu Abraham Beirazi Khithie chuan faina kawngah Siaha District chuan hma a sawn hret hret a ti a, Sawrkar, NGO leh Khawtlang tanrualna zarah MCC- 2023 ah Khawpui fai lawmman Pathumna a lo la tawh a, MCC- 2024 ah Pahnihna dinhmun a luah bawk tiin kuminah nasa lehzuala thawhhona nen Khawpui fai ber lawmman lak ngei an in beisei tih a sawi. Hun reiloteah Siaha chuan Bawlhhlawh sawngbawlna changtlung (Solid Waste Management Centre) hman theih turin a nei tawh dawn a, chu chuan awmze nei zawka bawlhhlawh sawngbawl kawngah nasa takin a pui dawn a ni, a ti. Construction & Demolition Waste, Hospital waste, Single Use Plastic (SUP) leh bawlhhlawh hrang hrang pawh awmze nei zawka thliar hran a ni tawh dawn a ti bawk.

Addl DC chuan faina tak tak nei tur chuan mahni theuh kan pawimawh ber a ti a, mahni tu leh fate rilruah faina chungchang nghet taka tuha a awm theih nan zirtir a, fai chu Pathian anna leh changkanna a nih thu uar taka zirtirtu nih tum theuh turin kalkhawmte a chah. Siaha Auto Rickshaw Owners Association ( SAROA) Welfare aiawh kalkhawmte chu thawhpuiah a sawm a, Siaha tihmingthatu leh tichmingchhetu an ni thei tiin an passenger phurhte hnenah pawh faina chungchang hrilhhretu ni turin a chah bawk a ni.

Siaha UD&PA, DEO Pi K Lalruatpuii chuan MCC-2025 neih dan tur Kalphung tarlanna a nei a, December 2025 atanga January 2026 inkarah endikna neih a ni anga, Nakkum January Ni 26 ah Result puan a nih tur thu a tarlang a ni.

Pi S Lalmuanpuii, Sr LAO, MADC chuan tawp kharna neiin kalkhawmte fuihna thu tha tak a sawi bawk.

Vawiin MCC -2025 khuhhawnnaah hian SAROA Welfare aiawha kalkhawmte hnenah Rickshaw Stand tina an hun tur Bawlhhlawh bawm bakah Mahni rickshaw theuha hun tur pocket dustbin hlan a ni bawk a ni.