2444/2024-2025

Siaha the 9th October 2024: Mara Thyutlia Py (MTP) Kum 70 tlin lawmna, Platinum Jubilee Main Celebration chu vawiin khan MADC Golden Jubilee Hall, Council Vaih, Siaha-ah neih a ni a, Bialtu MLA Dr K Beichhua, Ex-MTP President chuan Khuallian niin a hmanpui a, Pu Pakhaw Chozah, MTP Gen Hqrts President chuan he hun hi a kaihruai a ni.

Khuallian Dr K Beichhua chuan MTP kum 70 tlin lawmna, MTP history a Ni ropui tak, Platinum Jubilee lawmnaa Khuallian ni tura sawm a ni chu a ngaihlu takzet a ti a, kalkhawmte chu Jubilee Chibai a buk nghal. Siaha Bialtu MLA Dr K Beichhua chuan MTP dintute leh hruaitu hmasate chibai buk bawkin Mara ram tana an rilru leh ngaihtuahna zawng zawng an lo sen thinnaah lawmthu a sawi. Vawiina hruaitute chu MTP thupui leh dinchhan ropui tak ngaituah nawn fo turin a chah a, Midang tanpui thei tur chuan intodelh a tul tiin intodelh tur chuan taimakna a pawimawh a ti bawk. Mara thalaite leh mipuite chu MTP huang chhunga lungrual taka awmho turin a chah a, rilru thianghlim taka thawkho turin a chah. MTP Hruaitute chu Tlawmngai pawl an nih angin mipui tana thawk tura inpe an ni tih hre reng se, Midang tana ke pennaah malsawmna a awm tih hre thar leh turin a chah bawk. Mara Thyutlia Py te chu ram tana an rawngbawlnaah thatho leh chak takin hmalam pan zel se tiin duhsakna a hlan nghal bawk a ni.

MADC CEM Pu M Laikaw pawhin thu sawiin Mara Rama NGO Pawl lian berin Kum 70 na hmel an hmu thei chu a lawmpui hle a ti. Kum 70 chhung chak taka a lo kal tawhnaah leh lungrual taka Ram leh Hnam tana an inpekna ah lawmthu a sawi bawk. MTP chu Mara mipui zawng zawng huam khawmtu an nih bakah Mara hnam dinchhuahna innghahna, hmuh theih leh hmuh theihloh hmelma laka vengtu, hnam dan leh dun chawisangtu, vawnghimtu an ni a ti a, an mawhphurhna sang tak chu hlen zo thei turin inpumpekna tak tak a ngai a, Rilru thar nen theihtawpa thawk zel turin a chah bawk.

Vawiin Platinum Jubilee lawmna-ah hian District Bawrhsap Pu VL Hruaizela Khiangte pawhin thusawina neiin kalkhawmte chu Platinum Jubilee chibai a buk bawk. Sawrkar leh NGO te inkarah thawhhona tha a pawimawh tiin ram leh hnam hmasawn nan thawhhopuiah a sawm. District Bawrhsap chuan ‘Sawrkar leh NGO te chu kan hna thawh in ang lo mahse , kan thawh chhan leh kan thawh saka te chu mipui niin thuhmun a ni a, lungrual taka thawkho tur kan ni’  a ti. Mipui tana rawng bawlnaah mahni hlawkna tur ngaituah a thiang lo a, Kan awm chhan , kan pawl dinchhan hre thar leh turin leh Mipui tana thawk kan ni tih hre nawn fo turin kalkhawmte a sawm bawk.

Vawiin programme-ah hian Rev VL Ngaia Hlychho, Sr Advisor, MTP Gen Hqrts chuan hunserh a hmang a, Mara Hlasa Py (MHP) ten mawi takin MTP Platinum Jubilee Hla an rem a, zai mawi tak tak te nen hun hlimawm tak hmanho a ni. MTP tana thahnemngai taka lo thawk tawhte chawimawina hun hman ni bawkin Platinum Jubilee puala Poem writing competition a tithate lawmman semna hun chu Pu N Solomon Beihlotha, Secy Platinum Organising Board kaihruaina hnuaia neih nghal a ni.

MTP Platinum Jubilee Celebration puala Poem Competition buatsaiha lawmman dawngtute chu:

1) 1. S Beihmotaothei (Theiva) ₹7,000/-plus citation
2. J Monica Laldinpuii (Lobo) ₹5,000/- plus citation
3. Dolrys Beisiakhu (Lobo) ₹3,000/- plus citation te an ni.

Heng bakah hian consolation prize mi 5 te hnenah pek an ni a, pawisa fai cheng 500 theuh pek an ni.

Vawiin programme-ah hian MADC a Executive Member Pu K Chhuabei bakah ECM Assembly Moderator Rev K Laichhua Azyu, Mara Chano Py (MCHP) President Pi P Chaki, MSO President Pu Elson Eliasah Notlia hnen atangin thusawi ngaihthlak a ni bawk a, Pu Israel Chozah, Gen Secy MTP HQ Siaha chuan lawmthu sawiin vawiin hun chu tihtawp a ni. Programme zawh hian MTP Platinum Jubilee puala buatsaih ruai kil ho nghal bawk a ni.