Vawiin chawhma dar 11:30Am khan Govt. Saiha College Auditorium, Siaha-ah Mizoram Sawrkar Flagship Programme thar, New Economic Development Policy (NEDP) peng pawimawh tak Entrepreneurship Development Scheme (EDS) hnuaia hmalakna inzirtirna leh Business Plan Contest, 2017 kalpui mek chanchin inhrilhfiahna hun (Outreach programme) hman a ni.

He hun hi Pu Vanlalrova, Election Officer, Siaha District, Siaha chuan a kaihruai a. Tunlai khawvelah hlawhtling tur chuan thiamna tak tak neih a ngai tawh a, hmathar lakna tur ngaihtuah chhuak thiam leh harsatna tawh hnu pawh a dingchhuak leh tura ke pen ngam mihuaisen nih a tul, a ti a. Kan ram hmasawn nan chuan pawisa aiin hnathawh a pawimawh zawk a ni, a ti.

He hun ah hian EDS Master Trainer Dr. Benjamin Lalrinsanga chuan Mizoram Sawrkarin NEDP hnuaia EDS a duanchhuah dan leh hmalakna tur leh hmachhawp hrang hrangte sawifiahin, Pi Lalrinngheti pawhin EDS hnuaia Business Plan Contest (Mizoram Kailawn) 2017 kalpui mek chungchang leh tel ve tura tih dan turte a sawifiah a, la tih ngailo leh tih tawhte tan pawha hlawhtlinpui thama hmalak dan tur hriate chu he contest ah hian tel ve ngei tura sawmin, Govt. Saiha College zirlai pahnih te chu Ambassador atan an ruat nghal bawk.

Mizoram Business Plan Contest-2017 hi Sumdawnna kawng thar ruahmanna tha neite inelna tur a ni a, hetah hian hmalakna hlawk leh awmze nei tura ngaihte ruahmanna thehlut in, chu chu mithiamte’n a tha tha thlangchhuak in, Sawrkar chuan thlanchhuahte bul tanna tur lawmman a siamsak dawn a ni. Hemi a tel duh leh ruahmanna thehlut duhte tan www.mizoramkailawn.org ah emaw www.mizoramkailawn.com ahte Internet kal tlanga inziah luh theih a ni. Ruahmanna hi August Ni 31, 2017 thleng thehluh theih niin, mithiamte’n round-2 a an thlitfim hnuah final leh Entrepreneurship Summit chu October Ni 10, 2017 ah neih tur a ni.

Vawiin Outreach Programme ah hian Govt. Saiha College a zirtirtute leh zirlaite bakah Siaha khawpui chhunga Higher Secondary School zirlaite, Siaha District chhunga Self Help Group hrang hrangte bakah Siaha District a Official pawimawh eng emaw zat an tel a ni.