2015/2022-2023
Siaha, September ni 22 : Vawiin chawhma dar 10:30Am khan I&PR Conference Hall-ah ni hnih awh tur _Training on R.T.I Act, 2005 for SPIO's & SAPIO's under Siaha District, Administrative Training Institute (ATI),Aizawl leh DC Office, Siaha te tangkawp a buatsaih chu neih tan a ni. He training hawnna programme tawi te hi Pu Beihrosia Syuhlo, Course Co-ordinator leh Treasury Officer nibawk chuan a kaihruaiin, Pu Lalsangliana, Deputy Commissioner chuan khuallian niin vawiin Training programme hawnna hun a hmang.

Khuallian Pu Lalsangliana chuan training hawnna thuchah sawiin ATI,Aizawl in Siaha District chhunga SPIO leh SAPIO te tana RTI Act-2005 Training a buatsaih chu lawmawm a ti thu sawiin, tunah chuan On line hmangin india khua leh tui ten zawhna(Application) an thehluh theih tawh avangin, chhanna inpek te leh Information commission a complaint thehluh te a awlsam tawh em avangin, kan SPIO leh SAPIO ten RTI Act-2005 hi an hriatchiana, an fimkhur hle a ngai a ni, a ti.

Pu Sangliana chuan RTI Act in a thil tum ber chu Information hriat theina chanvo(Right to Information) hmanga India Khua leh tui te tihchak a, langtlang taka sawrkar kaltir te, eirukna khuahkhirh te leh sawrkar hmalakna reng reng mipui ten an hriatve theih nana kawng hawn sak a ni, a ti.

Ni 2 awh tur RTI Act,2005 Training hi Siaha District chhunga SPIO leh SAPIO te tan bik liau liau a buatsaih a ni a. District Resource Person for RTI Act,2005 Pu N.Vabeiratlua,Deputy Director,I&PR leh Pu Lalhmingliana,SDO(C) leh BDO, Tipa ni bawk ten zirtirna an nei a ni.

A ni khatna-ah hian Pu N. Vabeiratlua in RTI Act & Rules tih leh Pu Lalhmingliana'n Online RTI tih thupui hmangin zirtirna an pe a.

Naktuk tahrik ni 23.09.2022  khian training hi neih chhunzawm leh a ni dawn a,  Pu N. Vabeiratlua in RTI Act & Rule & Other Matters on RTI tih leh Pu Lalhmingliana'n  Landmark Judgements on RTI tih thupui a hmangin Training an pe leh dawn a ni.