Vawiin chawhma dar 10:30AM khan DC’s Office kawtah NLUP FAIR-CUM-EXHIBITION hlawhtling taka neih a ni. NLUP FAIR-CUM-EXHIBITION hawnna inkhawm hi DC’s Conference Hall-a neih a ni a. Dr.Chawngkhuma Chawngthu, AMFU President in inkhawm hi a kaihruaia, Pu Hiphei, Speaker Mizoram Legislative Assembly  leh  Pu N.Zakhai CEM,MADC chuan  khuallian leh Khualzahawm niin NLUP Fair- cum-Exhibition hawnna programme hi an hmanpui.

Vawiin NLUP FAIR-CUM- EXHIBITION hawnna inkhawmah thu sawiin, Khuallian Pu Hiphei chuan Nu leh Pa ten kan fa te tan thiltha tin reng kan duhsaka, mahni  kut-kea an dinchhuah theuh kan duhsak ang hian, Pu Lal thanhawla kaihhruai sawrkar pawh hian mirethei leh harsa zawk te hma ngaiin, an dinchhuah ve nana ngaituahna tam taka a sen hnu-ah he NLUP hi a duangchhuak ta a ni a. Sawrkar chuan miharsa leh pachhe zawk te tan cheng nuai khat lai a pek lai hian, pek tel ve thei hauh lo thil a pathum a nei a ni. Chung  thil 3 te  chu : Rinawmna, taimakna leh mahni inthununtheihna te hi a ni. He thil 3 te hi mitin ten hmasawnna kawng kan zawh nan leh miharsa leh pachhe zawk ten leirem an rah veh nana thil pawimawh em em a ni si a. NLUP Beneficiary rinawm leh taima tak pawh hi a taksa ber a hrisel tlat si lo chuan dinchhuah a har hle dawn a ni.   Chuvangin Rinawmna leh Taimakna bakah  NLUP hlawhtlinpui tur chuan  kan taksa  leh rilru a hrisel phawt a ngai a, chu mi atan chuan kawng engkima mahni inthunun theihna  leh insumtheihna hi mitin hian kan mamawh hle a ni, a ti.

Khualzahawm Pu N.Zakhai pawhin thu sawiin, a hriat ve thei chinah Pu Lal Thanhawla kaihhruai sawrkar bak hian Mizoramah hian eng sawrkar mah hian a thlawna miharsa leh rethei zawk te hnena cheng nuai khat pe chhuak hi ka la hre lo. Mi thenkhat ten NLUP hi hlawhchham lailet der angin sawi thin mahse, a diklo zia chu vawiina  NLUP FAIR-CUM- EXHIBITION a kan NLUP beneficiaries ten an thawhchhuah rah duhawm tak mipui te hmu theih tur leh lei theih tura an phochhuak hian a ti chiang hle a ni, a ti bawk.

Vawiin  NLUP FAIR-CUM-EXHIBITION-ah hian Line Department tin ten an hmalakna hrang hrang tarlanna Photo Exhibition bakah  an beneficiaries theuh te  thil tharchhuah an phochhuak hlawm a. NLUP FAIR chhimtu Mipui te lei theih turin  Sangha, Thlai leh Theirah, Silk Puan leh  Puan chi hrang hrang, Ar, Artui, Bawnghnu te, Vawk note, Buh chi hrang hrang chi 7, Hmunphiah, Coffee, Aieng etc..te chu  a langsarh zual an ni a. A chhimtu mipui in an hlut hle a, Artui, Sangha, Aieng , Zikhlum, Strawberry, Serthlum te chu rei lo te-ah hralh zawh vek a ni.

Vawiin NLUP FAIR CUM EXHIBITION hawnna inkhawmah hian Khuallian Pu Hiphei chuan Horticulture Department, Siaha Division hnuaia  NLUP 3rd & 4th Phase –a  Beneficiaries te hnenah  Rs.36,22,086/-a semchhuak bawk a ni. Vawiin hawnna inkhawmah hian Line Department a Head of Office tin ten vawiin FAIR cum EXHIBITION a an thil zawrh leh phochhuah chungchang report pein,  Pi  Lalnunmawi SDO(S) leh NLUP Nodal Officer ni bawk chuan lawmthu sawina hun hmangin hawnna inkhawm hi a khar ta a ni. Hawnna inkhawm hmanzawh hnu-ah  hian Khuallian leh khualzahawm te chuan  Stall tin te hi an tlawh chhuak vek a ni.