Vawiin chawhma dar 11:00Am khan DRDA Conference Hall-ah District Child Protection Unit bultumin Siaha-ah ‘Protection of Children from Sexual Offences (POCSO) Month’ hawnna programme hman a ni. He hun hi Dr. David Zaitinvawra, DCPO in a kaihruai a ni.

Vawiin POCSO Month hawnna inkhawm a khuallian Smt Harleen Kaur IAS, Deputy Commissioner, Siaha District, Siaha chuan thu sawiin, Naupangte hursualna laka an lo him theihna tur leh vanduaina tawkte’n huaisen taka an beih let theihna tura mitinte hnena zirtirna hun tha kan hman thei hi a lawmawm hle a ni, a ti a. April, 2014 POCSO Act Siaha District a hman tan a nih atanga vawiin thleng a District Child Protection Unit a Case Record en in Naupang pawngsual leh khuaikhemna hi 35 Case lai kan tawk tawh a ni tiin, report loh engemawzat a awm ngei pawh ka ring a ni, a ti a. Heng pawikhawihtute hi naupang hmelhriat tha leh an chhung hnaite an ni duh hle a ni. Hei hian naupangte hi khawi hmunah pawh an him tawhlo zia a tilang chiang hle a ni, a ti bawk.  Nu leh Pate hian kan tu leh fate hnena kan zirtir dan thin te hi thlak a hun tawh hle a ni tiin, naupangte hriat thiangloh a kan ngaina lai hi a pawina lai tak chu a ni, ti a. Zirtirna thar, rilru thar leh fim taka naupangte hnenah zirtir hi a khawtlang ang pawha kan uar thar sauh sauh a hun tawh hle a ni, a ti bawk.

Vawiin POCSO Month hawnna inkhawm a Resource Person Pu Lalramsanga, CJM, Siaha District chuan Power Point Presentation hmangin kalkhawmte chu POCSO Act, 2012 hrilhfiahna leh zirtirna hun a hmang bawk.

Kolodyne Royals (Siaha Bullet Club) te chuan Siaha khawpui chhung bakah Amobyu Vaihthie (Zero Point) thleng Rally an nei a, he rally hi Pu F. Lalbiakzauva, Addl. S.P. chuan a vailiam a ni. Pu Teddie T. Lalnunrema, Social Worker, CDPU, Siaha chuan lawmthu sawiin vawiin hun hi a titawp a ni.