No.6684/2020-2021
Siaha, November 27 : Vawiin khan Krishi Vigyan Kendra (KVK), Siaha District buatsaih Protection of Plant Varieties and Farmers Rights Act, 2001 zirtirna hun hman a ni. He hun hi Dr H. Vanlalhmuliana, Senior Scientist & Head, KVK, Siaha District in a kaihruai a ni.
Vawiin programme hmanna a khuallian Pu Lalthanzuala, District Agriculture Officer, Siaha District chuan thu sawiin, kan ramah hian Vaimim leh Buh chi dang, midangin an neih ve loh kan ngah em em a, heng zawng zawngte hi kan humhim a, a hlawk thei ang bera kan hman thiam a ngai hle a. Loneitu te pawhin Sapho thufing an sawi thin Mut hma a, thawh hma hi kan thupui ber nise, kan rinna nen pawh a inzawm tlat a, kan hlawhtlinna bul ber pawh a ni ngei ang tiin, vawiin loneitu kalkhawmte hnenah fuihna thuchah a sawi.
Pi C. Rachael, Subject Matter Specialist, KVK, Siaha District chuan zirtirna hun hmangin, kan ram tualto thlai, hmasang atanga awm tawhte neitu dik tak kan nihna humhalh tlat a tul zia te sawiin,Lo leh huan neituten kan dikna chanvo kan humhalh a tul ziate kalkhawmte hnenah zirtirna a pe bawk a ni.
Vawiin programme hi All Mizoram Farmers' Union (AMFU), Siaha District President Dr. Chawngkhuma Chawngthu leh Pu K. Malsawma, Secretary te pawhin an hmanpui bawk a ni.
