Vawiin chawhma dar 10:30 Am khan MSO Gen.Hqrs chuan an kum 50 tlin lawmna( Golden Jubilee Celebration) programme ni 2 hnih awhtur chu Siaha District Play Ground-ah an hmang a. Vawiin a ni khatna hi “Cultural Day” tiin; District Play Ground-ah Golden Jubilee lawmna an hmang a. A ni hnih ni erawh “Rising Day” ti in Multipurpose Community Hall; Council Vaih-ah an hmang thung dawn a ni. “Cultural Day”-ah hian Pu Hiphei, Speaker Mizoram Legislative Assembly khuallian a ni a. Naktuk “Rising Day”-ah hian Pu Lal Thanhawla, Chief Minister Mizoram chu khuallian a nithung dawn a ni.

Vawiin MSO(H) Golden Jubilee Celebration-a khuallian Pu Hiphei, Speaker Mizoram Legislative Assembly chuan thu sawiin, Mara rama Missionary te lo kal dan ka thlir let hian Mara hnam hi Pathian vohbik hnam kan ni ka ti lo thei lo. Mara rama an lo kal hmain Mara hnam hmingin “ Lakher Pioneer Mission” London-ah an lo din daih tawh a. Khawvel hmundangah hian Hnam hminga Mission din hi an awm ka la hre lo. Chu chauh ni lovin, Khawvel hmun hrang hranga Missionary te chu an ramah an kir leh thin. Kei ni kan Missionary te chuan min kirsan lovin ; vawiin ni thlengin an tu leh faten kan hnenah min la chenpui a ni. Chutiang khawpa Pathian duhsak hnam chuan; Pathian kan tih em? a duhzawng kan ti em? tih kan in en nawn fo a tul a ni, a ti. Pu Hiphei chuan MSO member te chu an motto “ For God and Maraland” tih hi hre reng tur leh Pathian tih leh A duhzawng tih hi Mara fate hlawhtlinna tur leh Mara hnam himna tura thil pawimawh ber a ni, a ti.

Pu AB Roma, MSO(H), Vice President hmasa ber chu Vawiin Jubilee lawmna programme-ah Khualzahawm niin, MSO tobul leh a lo dinchhuah dan te mipui kalkhawm te a hrilhriat bawk.

Vawiin Jubilee Celebration Programme ( Cultural Day)- ah hian MSO Jt. Hqrs te, Sub-Hqrs te leh Branch hrang hrang ten Mara hnam lam chi hrang hrang an en tir a ni.