2922/2024-2025

Siaha the 11th November, 2024: Vawiin khan DRDO Conference Hall, Siaha-ah November ni 14 a state pum huap mock drill neih tur chungchangah thutkhawmna neih a ni a, Addl. DC, Pu Abraham Beirazi Khithie, District Disaster Management Authority (DDMA) CEO ni bawk chuan he hun hi a kaihruai a ni.

District Bawrhsap, Pu VL Hruaizela Khiangte, District Disaster Management Authority (DDMA) Chairman ni bawk chuan State Level Mock Exercise neih tura chanvo nei zawng zawngte chu an mawhphurhna ngai pawimawh theuh turin a chah a, Mizoram chu Seismic Zone-5 a awm a nih avangin engtik lai pawhin rikrum thil, chhiat rup theihna thleng thei reng a ni a, mipuiin rilru fim tak nen rikrum thil thleng an hmachhawn theih nan mock exercise chu a pawimawh hle a ti. Mock drill neih tur chu lemchan mah ni se, an chanpual theuh hrechiang a, tih tak zeta an mawhphurhna hlen theuh tura fuih bawkin duhsakna a hlan nghal bawk a ni.

Pu VL Zuithanga, District Organiser (DM&R), DEOC Siaha chuan November Ni 14 Mock Exercise neih tur chungchanga hriattur pawimawh hrang hrang presentation a pe a, Landslide (lei min/ lei tawlh) drill neih a nih dawn thu tarlangin landslide vanga chhawmdawl ngai chhawmdawl dan tur leh mawhphurtu tur te, staging area chungchang te, Site Incident Commander tur te, Observer-te bakah District Emergency Operating Centre chungchangte leh hriattur tul leh pawimawh dangte tarlangin zawhna leh chhanna hun hman a ni bawk.

Mock drill hi November ni 14-ah chawhma dar 10:00 a neih tan tur a ni a, Siaha khaw chhungah hmun pali thlan niin, Meisavaih West-ECM Vaih Junction, Meisatla 1-boundary line with Meisavaih West, Highway Landslide (Meisatla 1- Zalen veng) leh District Hospital - a neih tur a ni a, Heng hmun 4 a Observer turin Dr Manesia Khaimeichho DTO, Pu Lalnunhlua SDPO, Pu R Lalnghakliana Asst Controller, Legal Metrology leh Dr Lalnunziri Sr CMO te ruat an ni.