1740/2024-2025

Siaha the 26th August, 2024: Vawiin chawhma dar 11:00 khan District Bawrhsap, District Level Working Committee Chairman ni bawk Pu VL Hruaizela Khiangte kaihhruaina hnuaiah kumin Teachers’ Day lawm dan tur relin DC Conference Hall-ah thutkhawmna neih a ni.

District Education Officer, District Level Working Committee Member Secretary ni bawk aiawhin HA Pi Jenny Lalthanpuii hnen atangin 2023 Teachers’ Day hman dan leh National Foundation for Teachers Welfare (NFTW) Fund chungchang report ngaihthlak a nih hnuah kumin Teachers’ Day hman dan tur hi rel chhunzawm nghal a ni.

District Bawrhsap Pu VL Hruaizela Khiangte chuan zirtirtute chu an pawimawh hle a, ‘Builders of the Nation’ (ram siam tha tu) an ni tiin an hna thawh chu a zahawmin nu leh pa ten an kutah ngaihngam taka an fate an dahna an ni a ti a, naupangte tana entawntlaka an nun a pawimawh hle tiin infuihthar a, an pawimawhna an hriatthar zel a pawimawh hle a ti, a ni.

Vawiin meeting chuan a hnuaia mi ang hian Teachers’ Day, 2024 hman dan tur a rel:-
1. September ni 5 a Teacher’s Day lo thleng tur chu zirlai naupang ten an zirtirtute an chawimawi theihna hun remchang a nih angin chawhma lamah chuan mahni school theuhah hun hman mai nise a ti a, Chawhnu ah erawh zirtirtute chawimawi nan leh infuihthar lehna hun atan Siaha khawpui chhunga zirtirtute zawng zawng tan a huhova programme buatsaih ni se, a ti.
2. ⁠Teachers’ Day lawmna program hi MYA Multipurpose Hall, New Siaha-ah hman ni se, DEO kaihhruaina hnuaiah District Bawrhsap chu Khuallian ni se tih a ni bawk.
3. ⁠Siaha khawchhunga hmun lun lai ah banner tar ni se tiin a tarna hmun tur leh a tartu tur te ruat nghal an ni.
4. ⁠Siaha district chhunga District, State leh National level-a Teacher Award lo dawng tawh te chu Teachers’ Day denchhan hian a ni ah chawimawina hun hman ni bawk se tih a ni.
5. ⁠Teachers’ Day 2024 pual hian Hon’ble Minister, School Education thuchah (message) chu school tinah chhiar chhuaha, a zau thei ang bera thawh chhuah ni se a ti.
6. ⁠Programme kimchang duang turin District Education Office leh MADC-a Education Department-te ruat an ni bawk.

Vawiin meeting-ah hian District Bawrhsap bakah District Council hotute, NGO hruaitute leh chanchinthar thehdarhtute bakah Pu S Zaluaia, National Teacher Award lo dawng tawh te a tel a ni.