No.1982/2021-2022
Aizawl; the 24th August,2021: Vawiin chawhnu dar 3:00pm khan Transport Minister Pu T.J. Lalnuntluanga chuan DTO office building thar cheng nuai Rs.210.33  senga sak chu a hawng. DTO office building thar hawnna inkhawm hi DRDA conference Hall-ah hman niin, Er.R.Lalrammawia, Director, Transport Department in a kaihruai a. He function hi Er.H.Lalzirliana,MLA leh Vice-Chairman,Road & Infrastructure Development Board ni bawk chuan Khualzahawm niin a hman pui bawk.

Er.R.Zirsangliana,EE,PWD Building Project Division,Lunglei chuan Technical Report peiin, he DTO hi zopa chhiara chhawng 4 a ni  a. A building pumpui zau zawng belhkhawm (Plinth Area) hi  645.97Sqm a ni. A structure hi RCC niin, a bang brick leh a chungkhuh hi RCC flat  a ni. Kum 2016, September ni 27 khan sak tan a ni a, nikum July ni 20 khan sak zawh a ni. He building  hi NEDP hnuai atanga a sak niin, a sakna thawktu Contractor hi L.Lalrochama,New colony Siaha a ni.

Vawiin DTO hawnna inkhawmah hian thu sawiin, Pu T.J. Lalnuntluanga chuan Transport Department hi dawrtu ngah ber  department te zing a mi a ni a. Mipui leh Office Staff te tan indawrna hmun thawl tha leh nuam a pawimawh hle a ni. Vawiinah Siaha in DTO office  Building thar tha zet mai in nei hi Siaha district mipui leh DTO staff te ka lawmpui hle che u a ni. He building thar chhung atang hian  DTO office staff ten hawihawm tak leh nuisang chungin  anmahni dawrtu  te an lo hmachhawn  anga, mipui pawhin DTO office in tihtur a ti te tha takin an lo zawm zel ka beisei tlat a,  chumi  atan chuan  siaha mipui leh DTO office staff te duhsak ka   hlan a ni, a ti.

Er.Lalzirliana, khualzahawm  pawhin thu sawiin, Siaha a vawikhat kalnaa, district tana ro tling building thar hawnnaa a tel thei chu lawmawm  a tih thu sawiin, Corporate khawvelah chuan Customer is king  tih hi an kalphung a ni a,  keini sawrkar hnathawk te pawh hian min dawrtute hi  kan  customer te an ni, tih i hre reng ila, mipui lam pawhin sorkara chhia (Tax) kan chhunluh te hmang hian  a ni sorkarin hmasawnna ruhrel hrang hrang a din thin tih hriain, Road Tax , Insurance, NOC etc  chungchangah  DTO office thu te hi i zawm zel ang u, a ti bawk.

Pu B.Lalchhawntluanga, DC charge la mektu pawhin thusawina nun a hmang bawk.

Pu T.J. Lalnuntluanga hi Aizawl atangin Pu Er.H.Lalzirliana,MLA & Vice Chairman,Road & Infrasructure Development Board, Er.R Lalrammawia,Director, Director Transport Department leh MNF Gen.Hqrs a hruaitu thenkhat ten an lo tawiawm a ni.