No.766/2020-2021

Tukin khan Legal Metrology Enforcement Staff, Siaha leh LAD, MADC te chu Siaha khawpui chhunga hmun hrang hranga Vawksa buk te enkualin an duty a, buk diklo a hralh mi 4 ( Meisatla--1 ,Meisavaih East- 2, New Siaha East--1 leh New Siah West- 1) man an ni a, an chungah dan angin hremna pek an ni ang.

Buk diklo a hralh Sa zuar man te hian kg khat (1000g) turah 800g te,900g te’n an pe chhuak a ni. Sazuarte hian Market chhungah sat lovin hmun remchang lai leh kilkhawr tak takah an sat a, endik tura duty pawh a ti hautak hle. Legal Metrology leh LAD staff duty te hian nikum lamah pawh vawi engemawzat buk diklo a sa zuar tum engemaw zat an lo man tawh a ni. Sa zuarte hmakhua ngaiin tunhnai mai khan vawksa man pawh thuneituten 1kg - Rs 300/- atangin Rs.350/- ah an lo ti sang tawh a ni.

Legal Metrology hian May ni 1, 2020 khan Siaha a Cigarrette man to uchuak taka supply tu pakhat chu man in dan angin an lo hrem tawh bawk a ni. Covid - 19 Lockdown avangin Siaha khawpui chhungah eichawp thil man sang lutuk awm lovin hralh zel a la ni a hriat a ni a. Thil man leh buk chungchang te uluk takin an vil rengin, dawrkai rinhlelhawm zual te chu an thil lakna Challan memo te an enfiah zel a ni.

Tukin duty hi Pu R.Lalnghakliana, Assistant Controller, Legal Metrology & Asst Nodal Officer, Management on Essential Commodities, Covid - 19 Siaha chuan a hova, Siaha Cement lo thleng thar tur pawh theih ang tawkin a buk tlin leh tlinloh te leh a hralhna man pawh enpui an tum a ni. Legal Metrology chuan Siaha District mipuite chu sa buk diklo an hriat sa te chu lei lo ngam tur leh an hnen a thlen thin turin an ngen a ni.