1206/2022-2023

Siaha; the 9th July,2022: Siaha district bawrhsap Pu Lalsangliana chuan vawiin khan Iana(Ainak) leh Siasi khua te tlawh leh in, Siaha district chhunga khaw awm zawng zawng a tlawhchhuak kim ta.

Pu Lalsangliana hian tahrik ni 8 February  thla khan Siaha district-ah bawrhsap in a rawn awm tan a. Siaha district-a   bawrhsapa  a lo awm ve leh a thil tih tum hmasa ber chu Siaha town chhunga Gov't of Mizoram hnuaia office zawng zawng  tlawhchhuah vek a, Head of Office te leh an staff te hnena inhmelhriattira, an office theuh te hmalak mek leh harsatna  te hriatpui a, an harsatna te chu Aizawla an Head of Department theuh te hnena thlen sak a ni. Tichuan ni 4 chhungin Siaha town chhunga Sawrkar Pisa zawng zawng tlawhchhuak vekin, an harsatna hrang hrang an lo thlen te chu Aizawl lama an Head of Department te hnenah ziakin a thlen sak hlawm a, a copy pawh concern office te hnenah a pe chhuak leh thlap a ni.

Office  zawng zawng a tlawhchhuah vek hnu hian Siaha District chhunga khaw 48 te chu tlawhchhuak vek tumin ke a pen leh ta a. 12th MADC General Election in a village tour hi tihkhaihlak deuh mahse vawiinah khan district chhunga khaw awm zawng zawng 48 chu a tlawh chhuak kim vek ta ni.

Pu Lalsangliana hian a Village tour nan hian Holiday leh Weekend holiday  te  hmang tangkaiin, office kal ni pangaiah a tour ngai lo a ni.Thingtlang khua a tlawhna chhan sawiin, Pu Lalsangliana chuan khawtin ka tlawh hian an khaw chanchin leh a michengte chanchin ka hriat bakah, an harsatna leh mamawh te an hmunah ngei kal chilh a, ka hmupui hian a chiang ber  a ni. Hei bakah hian DC an lo hmelhriat  ve hi hlu ka ti a, an khuaah ngei ka tlawh hian in hmelhriatna tha leh inthianthatna tha a hrinchuah ngei ka beisei tlat a ni, a ti.

khaw hrang hrang a  tlawh te hian DC hi an lo lawm hlawm hle a, kum tam tak DC hmel hmu tawh lo khua te phei chuan a khawnawtin an lo hmuak  thin a ni.

Pu Lalsangliana  pawhin DC anga a theina kawng kawngah Siaha district chhunga thingtlang khua te tan  theitawp chhuaha hnathawh a tum  thu a sawi bawk.

DC hian thingtlang khua zawng zawng tlawhchhuak tur hian tum 9 lai a zinchhuak a ni.