4579/2025-2026

Dated Siaha, the 24, February 2026: Vawiin chawhma dar 11:00A.M khân Siaha Police Station Conference Hall, Council Vaih, Siahaah dan kengkawhtute tán ni khat awh Prohibition of Electronic Cigarettes Act, 2019 zirhona neih a ni a, Dr. Zoramthangi Renthlei, State Nodal Officer, National Tobacco Control Programme chuan a hmanpui.

Thu sawiin Dr. Zoramthangi Renthlei chuan "India ram hi zuk leh hmuam uar ram kan ni a, state hrang hrang zingah Mizoram hi zuk leh hmuam tinasa tehnaah pahnihna kan ni mêk a, chuvangin kan dinhmun aṭanga dinhmun ṭha zawka ding turin sawrkar leh a thawktute pawhin nasa takin ṭan an la a, mipui, tlawmngai pawl leh kohhran nen ṭanrual a ngai a ni,” a ti.

Zuk leh hmuam ti lo zingah natna hlauhawm tak tak vei an awm ṭhin tih chu an hriat thu Dr. Zoramthangi Renthlei hian sawiin, “Mihring hi vannei, vanduai leh laihawl kan awm a. A laihawl hi mi nawlpui kan ni a, kan ei leh in leh nunphung avangin vannei huanga awm thei leh vanduaina tawng thei kan ni a, chuvangin invenna leh fimkhurna hi kan kalpui reng a ngai a ni,” a ti.

Zuk leh hmuama fihlim lo, nghei harsa titakte hi chhuan lo la awm tûrte tana palai hna thawktu pawimawh tâk an nih theih thu State Nodal Officer, National Tobacco Control Programme hian sawiin, ‘Zirlai naupang leh ṭhangtharte hian tunlaina emaw tiin zuk leh hmuam tih hi an intihhmuh chho em em a, E-cigarettes (vapes) bur mawi tak tak; mit la taka siamte hi a hlauhawm loh bik lo a, mi zingah inthlahrunna nei miah lohva awrh hial an awmte hi a pawi em em a. Sports department-in 'Catch them young' an kalpui ang hian National Tobacco Control Programme pawh hian naupang zawkte hi tihchhinna aṭanga a bawiha an luh lohna turin ṭan nasa takin a la a, zirna inah leh Sunday school-ah te inzirtirna nasa taka kalpui a ni,” a ti.

Dr. Zoramthangi Renthlei chuan chhungkua, khawtlâng leh ram sum leh pai dinhmun thlengin vaihlo hian a nghawng tih sawiin, “Vaihlo kg 1 hi zawrh tura an siam nân hian thing leh mau kg 8 an hmang ṭhin a. Non communicable diseases natna hrang hrang thlentu langsar bêr chu vaihhlo a ni a, kan damlohin inenkawlna sum leh pai tam tak sen a lo ngai a, chhungkaw sum leh sawrkar sum nasa tak kan seng ṭhin a ni. Zuk leh hmuam hi kan sim thei lo anih pawhin tih phal lohna hmun kan zah tur a ni” a ti. Nikum aṭangin Mizoramin mikhual kan thleng nasa a, an sawi lar bêr chu "Mizo zingah meizu kan tam lutuk te, mipui tana lirthei khalhtu ṭhenkhatin lirthei chhungah mei an zu hi a ni a, kan ram mawina kan larpui rual hian zuk leh hmuam kan tinasa hi kan hmingchhiatpui lo vang tih a sawi theih miah loh,” a ti bawk.

Vawiin hun hmannaah hian Siaha district enforcement force bakah health department official leh MJA an tel a. Pu Vanlalpeka, SDPO, Siaha-in hun a kaihruai a, Pi Vanlalzari, State Legal Consultant, NTCP in Prohibition of Electronic Cigarettes Act, 2019 leh Cigarettes and Other Tobacco Products Act (COTPA), 2003 zirtirna a nei a, zawhna leh chhanna hun hman a ni bawk. Pu R. Lalremruata, State Consultant, NTCP-chuan ‘Mizoram mipui zaa 58 chu zuk leh hmuam laka fihlim lo kan ni’ a, a ti mekte hian sim se kan duh ber anih rualin chhuan lo la awm turte hmakhua ngaihna avangin Mizoram district headquarters zawng zawngah inzirtirna hi kalpui tum a nih thu a sawi. Dr. Lalrengpuii Ralte, CMO & DNO, NTCP Siaha chuan lawmthu sawina a nei a, hun hman tihtawp a ni.