No.1990/2020-2020

Siaha; June ni 12: Vawiin chawhma khan Siaha District Bawrhsap Pu Bhupesh Chaudhary IAS chuan Tipi Ferry khua leh Kaochao 'E' khua-ah Health Sub Centre building thar a hawng.

Tipi Ferry-a Health Sub -Centre hi MGNEGS sum atanga Rs.10,67,612/- senga sak a ni a.Kaochao 'E' a mi pawh hi MGNREGS sum atanga tho va Rs. 10,75,274/- senga sak a ni.

He hawnna inkhawm tawiah hian thu sawiin; Pu Bhupesh Chaudhary chuan Siaha District hi Nau chunga Nu thina(Maternal Mortality Rate) leh Nausen thina (Infant Mortality Rate) sangber kan ni. Siaha-a Bawrhsap a ka thut ve leh mutmawh hnarmawha ka nei chu IMR leh MMR tih hniam hi a ni. Tunah chuan hma kan sawn tawh hle a ni. Vawiina Sub-Centre kan hawn te pawh hi chutiang atana hmalakna chi khat chu a ni a, tunah hian Sub-Centre building thar 3: Tipi Ferry, Kaochao 'E' leh Vahia khua-ah te sak zawh tawh a ni. Heng bakah hian nikumah khan Company lian atangin Mobile Medical Unit Van (MMU VAN) dilchhuah a ni a, MMU VAN hian Doctor,Nurse, Damdawi leh test kit hrang hranga chhawm tel a ni. Mobile Medical Unit Van hian Siaha district chhunga PHC leh HSC awm lohna khaw hrang hrang te chu kar khat/hnih danah a fang thin a, in khuaah pawh a lo kal tawh kha. IMR leh MMR tihniam tur hian Thingtlang lama cheng Nu nau hrinna kawnga harsatna nei ten Civil Hospital, Siaha an pan zung zung theih nan Company lian atangin Ambulance dilchhuakin, Civil Hospitala dah fel tawh a ni. Chuvangin hetianga nau neih tur harsatna tawk in awm chuan Asha emaw khawtlang hruaitute emaw kaltlang pawhin Civil Hospital hrilhriat vat tur a ni, a ti.

Bawrhsap chuan Tipi Ferry leh Kaochao 'E' khua a VLTF te hnenah Covid-19 dona kawnga hma an lo lak tawhna-ah lawmthu sawiin; Siaha district luhka in nih angin duty pawh in rimin in hah hle tih DLTF in kan hriatpui che u a, zahna chibai kan buk a che u. Tha thlah lova Covid-19 dona kawnga ke lo pen chhunzawm zel turin ka ngen a che u, a ti.

Pu Bhupesh chuan Covid-19 hian chuti maia min kiansan a rinawm lo va, chuvangin Covid-19 nena chenho thiam kan zir a hun tawh a ni. Kut silhfai,Hmaikawr vuah,Social distancing kenkawh leh mitin mahni himna theuh kan ngaihtuah a hun tawh. Quanrantine Facilities atanga lo chhuak te hi lo thinhrik lo tur,fimkhurna vawng reng chunga lo dawnsawn zawk tur an ni. Awmze neih lova hlau thlabara awma, lo chi-ai vak hian engmah kawngro a su lo, mahni taksa thianghlimna leh hriselna vawn uluka, fimkhurna nena Covid-19 lo hmachhawn hi vawiin ni atang chuan mitinin kan tih tur a ni tawh zawk a ni, a ti bawk.

DC hian Tipi Ferry
VLTF te hnenah Rs 2000/- a hlan a,
MTP hnenah Silpauline+Football+Volleyball a pe bawk.

Kaochao 'E', VLTF I&II hnenah Rs 2000/- ve ve pein, MTP hnenah Silpauline+ Football+ Volleyball a pe bawk.

Vawiin Sub-Centre hawnna-ah hian DC hi Official thenkhat leh MTP(H) hruaitu ten an tawiawm a ni.