699/2024-2025

Dated Siaha, 6th June, 2024 : District Level Sub-Committee on Green Mizoram bultumin vawiin chawhnu dar 1 khan 'Green Mizoram Day 2024' hman dan tur relin  DC Mini Conference Hall- ah thutkhawmna neih a ni a, Pu V.L. Hruaizela Khiangte, District Bawrhsap leh Chairman, District Level Sub-Committee on Green Mizoram nibawk chuan thutkhawm hi a kaihruai.

Pu V.L. Hruaizela Khiangte chuan 'Green Mizoram Day' pualin kum tinin thing phun thin a ni a, damkhawchhuak (survival rate) erawh a hniam hle thin niin a lang a, thingphun enkawl chhunzawm kawngah uar zawka hmalak a tul takzet a ni, a ti. A bik takin thingphun te a  hungna tur uluk taka siam a tul hle tiin, a phuntute chauh ni lovin mipuite pawhin a enkawl kawngah hmasawn a ngai hle a ti. Thingphun tichhe thin zingah a  bik takin bawng leh kel hian an ti chhe nasa hle tih tarlangin a vulhtute pawh fimkhur zual turin a chah nghal a ni.

Bawrhsap chuan kan chhehvel enin thingphun uar a tul hle a ti a. Thing leh mau hian boruak hip tur thianghlim tak min pek bakah, leimin nasa tak lakah min venghim nasa hle a, tui hna tha tak min pe bawk tiin, a hlawkna kawng tam takin kan tel thin a ni, a ti. Khawvel ram changkang tak takte hian thingphun leh ramngaw humhalh an uar hle a, chu chuan ram nuam tak ah a cheng tir a ni tiin Pu V.L. Hruaizela Khiangte chuan Mizoramah pawh thingphun leh ramngaw humhalh kan uar sauh sauh chuan ram nuam leh chenna tlak takah kan siam dawn a ni, a ti. Kumin Green Mizoram Day ah pawh thing tam tak kan phun leh dawn a, a phunah duhtawk mai lo tur leh enkawl puitling ngei tura rilru put a tul hle a ti. Sawrkar department hrang hrang, NGO leh Siaha mipuite chu thingphun uar zel tur leh enkawl puitling ngei turin bawrhsap chuan  a sawm nghal bawk.

Vawiin thutkhawmah hian Green Mizoram Day hman dan tur kawng hrang hrang rel a ni a. Green Mizoram Day  Ni 11, June zing dar 6 atangin thingphun tur- Ngiau, Char, Rihnim, Tlaizawng, Theihai leh a dangte chu mipuite tan  semchhuah a ni dawn a, zing dar 9:30 ah Green Mizoram Day puala program tawi  hmanna hi Forest Hall, MADC ah neih a ni ang. Green Mizoram Day lawmna inkhawmah hian Executive Member, MADC, Forest Department changtu chu khuallian a ni dawn a, SDO (S) chuan inkhawm hi a kaihruai dawn ang. He hunah hian lawmman semna neih nghal tur niin, Kangmei chhuak lo tura thawk tha ber khua  leh kangmei laka inzirtirna lama thawh hlawk  ber chanchinbu hnenah lawmman hi hlan a ni ang.

Kumin Green Mizoram Day pual hian Siaha District- a sawrkar department hrang hrang ten thingphun runpui an nei dawn a, Tisopi khua panna kawngah heng thingtiak te hi phun a ni dawn a.  Sawrkar Department- te chu an thingphun theuhte chu chhinchhiahna lo siam tura tih niin thingphun tak te nung that leh that loh ( survival rate) hi Forest Department, MADC ten  enfiahin felfai takin an lo chhinchhiah dawn a ni.

Green Mizoram Day hi kum tin  hman thin niin kumin ah hian June ni 11 ah hman tur niin Thupui atan ' Plant Trees for Your life/ I nunna atan thing phun rawh' tih  thlan a ni.

Vawiin thutkhawmah hian Siaha district chhunga sawrkar department hrang hrang awiawhte an tel kim tha hle a ni.