No.4419/2021-2022

Aizawl March ni 26 : Siaha District Bawrhsap Pu Lalsangliana chuan  ni hnih(2) thangin Siaha District khaw thenkhat, Kahrie tlangdung chhehvel khua: Siatlai, Zyhno, Chheihlu, Mawhrei leh Chapi khua te chu an khaw dinhmun hriat chian nan a  tlawh hlawm.

Amah an lo hmuahna-ah thu sawiin,  Bawrhsap Pu Lalsangliana chuan  DC ka nih anga district mipuite tha taka rawng  bawl sak hi ka tum a ni a. Chumi ti theih tura thil pawimawh hmasa ber chu in khua-ah ngei lo tlawh che u a, lo in hmelhriattir che u leh in dinhmun te lo hriatchian hi a ni a. Chumi atan  chuan vawiinah hian in khua hi ka rawn tlawh a ni, a ti.

Siaha District a ka rawn awm hian thu mai mai tura rawn awm ka ni lo va, a taka hna thawk tura lo kal ka ni tih hi ka hrechiang em em a ni. Chuvangin, tun hi ka rawn kal tawpna tur ni lovin, a bul tanna chauh a ni tih min hriatsak turin ka ngen bawk che u, a ti a. Chuti rual chuan hna kan thawhna tur leh hma kan lakna tur kawng hrang hrangah nangni pawhin min tawiawm tlat turin ka ngen a che u, a ti.

Pu Lalsangliana chuan a khaw tlawh a piangah Kangmei laka fimkhur tur leh Faina kawnga tan la zual sauh turin mipui te a ngen hlawm a ni.

 Kan unau Myanmar lam atanga sa himna zawnga in khua rawn belhtu ten  thlamuang tak leh hahdam taka an awm theih nan duat takin inlo enkawl tih te  ka lo hria a, ka lawm tak zet a ni.
Chuti rual erawh chuan in  khuaa dan leh dun in siam te an zawm that a tul thu VC, MTP, MCHP leh MSO ten an hrilhriat ve reng a ngai ang, a ti.

Khawtinah DC hi khawtlang hruaitu te leh tlawmngai pawl hruaitu ten lo kawmin,  khawtlang tan a an mamawh chi hrang hrang te an lo thlen a ni.

Pu Lalsangliana chuan Khaw hrang hrang a tlawhna a Refugee te dinhmun chu an chenna hmun ngeia kal chilhin, an dinhmun a enfiah a. Heng khaw hrang hrang a tlawhna a raltlante tanpui nan Blanket panga theuh leh Hygiene kit box nga theuh a mamawh zualte hman a tan a pe hlawm a ni.

Kahrie tlangdung fanga a zinnaah hian Siaha DC hi Pu Lalhmingliana, SDO(C), Tipa RD Block leh Pu Lalzuiliana, District Co-ordinator, DM&R, Siaha ten an tawiawm a ni.