1062/2025-2026

Siaha the 4th July, 2025: Vawiin chawhma dar 11 khan MADC Forest Hall, Siaha-ah Siaha District Cooperative Union Assembly vawi 26-na neih a ni a, Pu Lalnunsanga, Chairman,  Mizoram Co-operative Apex Bank Ltd. chu Khuallian niin Pi N. Maki, DRCS, MADC, Siaha chu Khualzahawm a ni. Thupuiah ‘Cooperatives build a better world’ tih hman a ni.

Vawiin inkhawm hi Pu K Mara, President, SDCU Siaha-in kaihruaiin Pu N Lalhmingmawia, EO, SDCU/ARCS-in annual report a pe a, kum 2024-2025 chhunga Siaha District Cooperative Union sum lakluh/hmuh zat chu ₹66,73,120/- niin ₹66,66,437/- hmanral a ni a, kuta pawisa kawl mek zat chu ₹6,683/- a ni.

Khuallian chuan thu sawiin India ramin khawvel ram economy ropui tak ni tura hma a lakna ‘Viksit Bharat 2047’ peng pawimawh tak pakhat chu cooperative society hi a ni a, ram hruaitute hmathlir tihlawhtling tur chuan pawl hrang hrang kan pawimawh a. WHO in kumin chu ‘International year of cooperative’-ah a puan angin state tinte pawh he hun hmang tur hian a inbuatsaih mup mup a, kan hlutna hmuthiam an awm hi chhawr ṭangkai kan tum tur a ni, a ti.

Mizo ṭhalai hna zawng mekte tan nikum chhungin The Mizoram Co-operative Apex Bank Ltd. In Junior Management Grade – I [JMG-I] 3 leh Assistant Grade-I [AG-I] 27 an lak thu sawiin kuminah pawh Junior Management Grade – I [JMG-I] 3 leh Assistant Grade-I [AG-I] 24 la tura an inbuatsaih mek thu a sawi bawk.

Mizoram Co-operative Apex Bank Ltd. in nikumah hlawkna 46 crore a hmu a, Bank branch thar Khuangleng, Vairengte, Chawngte, W. Phaileng, Falkawn leh Darlawnah hawn tum anih thu sawiin District council hotute nen thawhhona ṭha tak an neihah lawmthu a sawi a, thawhhona thuthlung an ziah chhunzawm zel a beisei thu a sawi bawk. Khuallian hian MCAB  chu RBI hnuaia Scheduled Regional Rural Bank a inziahluh tuma hmalak mek anih thu leh kum 2024 leh 2025 khan kum zawnin India rama cooperative bank ṭha ber an dawn thu kalkhawmte hmaah a sawi.

MCAB  Chairman chuan pawl hmalakna reng reng chu kalkhawmte rel leh sawihona aṭanga thuthlukna siam ṭhin nise a fuh ber thu sawiin sawihona chuan mi a fuihin tuina a siam a, ngaihtuahna min sen tirin hmasawnna leh inlungrualna a thlen a, chu chu society lungphum pawimawh tak a ni, a ti. Thawkho turte lungrual taka thawhho a pawimawh a, thawkho tur ngawih ngawihte thawhho theih lohna chuan rah ṭha a chhuah thei lo a tibawk.

Khualzahawm Pi N Maki pawhin thu sawiin cooperative society thiltum ber chu ram leh hnam chawisan a ni a, mi retheite khaichhuah leh dinhmun ṭha zawka a din theihna tura ṭanpui hi a tum niin chumi tihhlawhtling tur chuan rinawm leh dik takin hmangaihna nen thiltih a ngai a. Eizawnna leh khawsak a harsa telh telh a, kan tu leh fate hi sawrkar hnain a daih vek dawn loh avangin tun aṭangin society aṭanga eizawn dan an thiam theih nan kan puih a, kan fuih an ngai a. Keimahni, kan chhungkua, veng leh ram hian society inhlawmkhawm ṭha takte hlawkna hi an tel tur a ni a, chumi tur chuan beidawng lova thawk sauh sauh turin society hrang hrang kalkhawmte a sawm bawk. 

Chawhma hun hman zawh hian chawhnu lamah rorel inkhawm neih niin thil chi hrang hrang rel a ni a, Pu S. Beizawngia, BoD, SDCU chuan lawmthu sawiin rorel inkhawm tihtawp a ni.